Baghmara, July 30, 2022:South Garo Hills a•jani, Anti-Naxal Task Force (ANTF) dol a•songo jakkalna on•gijagipa Phensedryl, Cough Syrup-ko badinggiparangni koborko man•soe am•sandianiko a•bachengaha.
Indake ANTF aro Baghmara PS-ni pulisrang Karukol Konagittim songni saksa bilsi 54 ong•gipa Barnick R. Sangma-ni nokko chadrape sandianiko dakeaha. Pulisrang uni nokoniko palna on•gijagipa sam cough syrup te 120 bottle-rangko man•aha. Uni nokko chadrapanio saksa bilsi 24 ong•gipa Md Sahidar Rahman-ni depante Md Ashraful Miah, bilsi 29 ong•gipa Md Abdul Hai-ni depante Md Belu Miah, bilsi 31 ong•gipa Md Sahunur Islam-ni depante Sapul Islam-ko rim•aha. Uamang Mankachar Joradangga, South Salmara, Dhubri district Assam-oni ong•achim.
Unbaksana Baghmara, Balkal Immikagre songni Gender S Marak-ni depante bilsi 34 ong•gipa Betason M Sangma-ko pulisrang ia bosturangko bading chiwalanio jak dongani gimin rim•aha.