WR-o Muster Roll ka•enggipa ja 19-ni hajirako on•china AMMRPWU-GHZ dabia 

0

Tura, Oct 20, 2022:  All Meghalaya Muster Roll Progressive Workers Union (AMMRPWU) HQ aro Garo Hills Zone (GHZ)-ni dilgiparang re•anggipa 2020 bilsini March 10 tariko a•dokni Skotong Minister Pa Conrad Sangma-ko uni dongchakram Banglow, Shillong-o gronge, dingtang dingtang sorkari department-rango Muster Roll (MR) ka•enggiparangni man•gni hajirarangko jaanti on•china, sorkarini dongimin niam gita 50% Group D post-o Regular Casual Worker (RCW) MR-rangko appoint ka•china, MR-rangna Employee Provision Fund (EPF)-ko on•china, MR-rangko bilsi ru•utani kri category ge•bri Unskilled, Semi-Skilled, Skilled aro Highly-Skilled-ona ra•dochina aro MR-rangna bilsio sal 15 Casual Leave (CL) aro me•chikrangna Maternity Leave sal 90 ja 3-ko on•china dabie segimin Memorandum-ko on•aha.

MR-rangni hajirarangko on•a tik ong•jani bidingo MMRPWU-ni dilgiparang Skotong Minister baksa agan-golpogrikon, Skotong Minister, MR-rangni hajirako jaanti on•na gita ku•rachakaha. Indaken Skotong Minister-ni ku•rachaka gitan da•o dipet PWD, PHE, Agriculture, Horticulture, Soil Conservation, Forest, department-rango MR-rangni hajirako jaanti regular ong•e man•enga, indiba Garo Hills-ni dingtang dingtang Water Resources (WR) chongmotan Irrigation Department-ni division-rango MR-rangnj man•gni hajirangko on•chipgija donenga.

Uni gimin, MMRPWU-Garo Hills Zone-ni dilgiparang October 17 tariko WR-ni Chief Engineer (CE)-ko Shillong-o gronge, maimancha ong•enga sing•sandianiko dakahaon, CE sorkarian fund on•jaode, “anga pockettangni tangkako on•na man•genma” ine aganchakaha. Hajira man•gija dongenggipa WR Phulbari division ja 19, Tura division ja 13 aro Resubelpara ja 12 hajira gri kamrangko ka•e on•enga. Iarang gimikan CE aro EE-rangni simsakgijani a•sel ong•aha ine ma•sina man•aha.

Indita bilsi aro jarangna MR-rangni hajirarangko on•gija kal•e roengani gimin October 19 tarik Butbar salo AMMRPWU-Garo Hills Zone-ni dilgiparang Skotong Minister Pa Conrad Sangma-ko Tura-o gronge agangrikahaon, gipin department-rang jaanti regular man•enga ong•ode, WR department ge•samangmang maina man•jaenga, ‘something is wrong’ ine Skotong Minister, rang•san Principal Secretary-na call ka•e, iani bidingo ta•rake sandiatchina didiataha.

Indake WR-ni CE MR-rangko kal•e roengani gimin Union nidame dongchajawa, antisa somoiko on•nggen, uni gisepon, CE aro EE-rang MR-rangni hajirarang ja 19-niko chu•gimik changsano on•ja ong•ode, Union raka ja•kurangko de•angskagen.

Skotong Minister-ni agana gitade, Meghalaya a•dokni pilak sorkari department-rango MR ka•enggiparangni hajirarangko jaantian on•atenga ine aganaha.

Indiba WR Department-ni CE aro EE-rangsa MR-rangni man•gni hajirarangko jakkalsrete da•alona kingking on•chipgija donenba, sorkari fund on•atja ine tol•aniko Union rim•a man•aha ine AMMRPWU-ni Geberal Secretary D Sangma parakatskaha.

Leave A Reply

Your email address will not be published.