Tura, August 2, 2022: Garo Students’ Union Centre Executive Committee (GSU-CEC), Tura Monggolbar salo a•dokni Power Minister Preston Tynsong-na West Garo Hills a•jani Deputy Commissioner Swapnil Tembe-ni jak gita lekka sedoataha.
GSU-ni seatgipa lekkao Garo Hills a•jani MeECL Department-o chu•onga gita kam ka•gipa manderangko rakkina nanga ine janapataha.
“Garo Hills a•jani MeECL Department-o chu•onga gita kam ka•gipa manderang dongjani a•sel bijoli nosto ong•arangko tarina gita neng•nikanirangko man•enga aro bijoli tik ong•jaenga. Re•anggipa 2017 aro 2018 bilsio kamna gital seokako man•gipa Garo Hills-ni manderangko Khasi Hills a•jaona kam ra•jitangaha, indiba Khasi Hills a•jani kam ka•gipa saksakoba Garo Hills-ona ra•baska dongja. 2020 bilsio Junior Engineer-ni kamna manderangko seokanio MeECL department a•dokni dongimin 40/40 Job Reservation Policy-ko ja•rikjaha. Apsandake 2020 bilsini June 20 tariko MeECL Department-o sak 20 manderangko dingtang dingtang kamna seokaha, RTI ka•anio ma•siani gitade, ua sak 20 manderangko Department-na a•a on•ani giminsa uamangko kamo rakiaha ine parakaha. Uasan ong•aigija Khasi Hills a•jao sak 59 manderangko Contract basiso kamna rakkiaha, indake kamo rakkiako man•gipa mamderang gimikkon gipinchi poating ka•gija Khasi Hills a•jao rakkiaha, indake MeECL department ong•gija kamko ka•aha. Uni ja•man 2019 aro 2020 bilsio Nongalbibra aro Williamnagar-o kam ka•giparango aro Tower Line Department-ni Staff-rangko Khasi Hills a•jaona ra•jitangtokaha, indiba Khasi Hills a•jao kam ka•gipa saksakoba Garo Hills-ona ra•baska dongja. RTI ka•e ma•siani gitade, Shillong Head Office-o A•chik saksakoba Junior Assistant aro Administrative Assistant-ni kamo rakkia dongjaha” ine GSU-CEC janapataha.
Khasi Hills-o kamrangko nakatate manderangko seoka gitan Garo Hills-oba kamrangko ong•katate seokna nanga. Uni gimin “Chingni sing•anirangna salsnini gisepo maming aganchakaniko on•na man•jaode, chinga dal•a jingjengatanirangko ong•atanggen ine GSU-CEC-ni General Secretary Bibian G.Momin parakataha.