Tura, Nov 5, 2022: National People’s Youth Front (NPYF) chadambe dolni State Working President Dabo M.Marak, West Garo Hills-ni NPYF President Silban R.Marak aro gipin dilgiparang, Sonibar pringo Tura Najing Bajar aro Tura Bajaro bosturangko ra•chakna namgipa jolarang ba carry bag-rangko indin suale on•angaha.
NPYF-ni bosturangko ra•chakgipa bekrangko indin suale on•ani miksongara, samtangtango donggipa chiring-chibisikrang, buring bolgrimrangko nosto ong•atgipa plastic bekrangko ba bostu ra•chakanirangko dontongatna gita soe gimagipa ra•chakani bekrangko sualangaha.
Ia bostu ra•chakanirangko suale on•anichi an•chingni samtangtango ba wilwilao donggipa chiring-chibisikrang aro buring bolgrimrangko nosto ong•atgijagipa, jean dingtang dingtang men•dioniko ra•e tarigimin jakkalna namgipa ong•a. Manderangni be•en bimangko an•seng baljokanina namgipa jakkalaniba ong•a. Ia ra•chakani bekrang sal 90-ni ja•manon an•tangari soe jrongaigipa aro gimaaigipa ong•a. Uni gimin ia bekrangko a•ao dape aro so•e galna nangjawa, maina galani ja•mano an•tangari soe bon•angaigipa bostu ong•a. Uni gimin sogijagipa plastic bekrangko champengna NPYF man•adipet jaanti dokkan dakgiparang aro pale sim•e cha•giparangna indin suale on•na miksongenga ine NPYF-ni State Working President Dabo Marak parakataha.
Iako songsalni aro manderangni namgnina a•bachenge on•gipa a•dokni Skotong Minister Conrad Sangma-ko NPYF mittelangaha. Jedakode mikkangchi Meghalaya a•dok plastic grigipa, rongtalanian gapgipa aro tangsekgilgil dakgipa Meghalaya a•dokko ong•atna, an•ching sakantian ku•mongna ine Dabo Marak songdongenggipa sakantiko mu•mongangaha.