Tura, April 6, 2022: Garoland State Movement Committee (GSMC) HQ, CEC Tura, Skotong Minister Conrad Sangma-ni kamna suk ong•gijaniko parakataha.
GSMC-HQ, Tura-ni Organizing Secretary Jason Tekrang M.Sangma-ni janapata gitade, skangode A•chikrang songnok ge•sao apsan songdong a•chaachim, indiba jensalo 1947 bilsio India jakgitel man•ahaon, bang•a A•chik songrangko Bangladesh-o galbana nangaha aro uni ja•mano 1972 bilsio Meghalaya-ko Assam-oniko ma•ekate bang•a A•chik songrangko Assam-chi galbana nangtaiaha. Uni ja•mano Megahalaya a•dokko man•bae, Khasi Garo Jaintia-ko district on•taie ari saltaion bang•bea A•chik A•kingrangko Khasi Hills-o chapataha.
Indake A•chikrangni songrangko bilding bildang ong•ataha. Uni gisepon A•chikrangni gimagimin A•dokrangko apsan ong•atna ba man•piltaina bang•a dingtang dingtang A•chik dilgiparang aro dolrang, jekai Sonaram R.Sangma, ALMA (A•chik Liberation Matgrik Army), ANVC (A•chik National Volunteer Council), GNC (Garo National Council) rakbee jotton ka•angaha, indiba chu•sokna man•jaha.Apsandake da•alo GSMC-ba Sonaram Sangma-ni ja•gamko ja•rike, gimagimin A•chikrangni a•dokrangko apsan ong•atpilna A•chikrangni a•dokrangko Map wa•reng salna dabiengon, Khasi Hills-o dongeggipa A•chikrangni a•dokrangko Assam a•dokna Meghalaya-ni Skotong Minister Conrad Sangma name sandichenggija, songni nokni manderango sing•chenggija pakwataniko GSMC jegalataha.
A•chikrangni ku•cholsan tom•tome songdong a•chaengako, skangon dingtang dingtang dilgiparang ba political party-rang bilding bildang ong•ataha aro da•aloba apsan daken A•chikrangko divide and rule policy-ko jakkale, A•chikrangko duk mikchi ong•atenga ineba janapataha. Uni gimin, chinga A•chik dedrang Conrad Sangma-ni indakgipa kamko raken jegalna sika ineba Tekrang Sangma janapataha.