Shillong, July 1, 2022: Meghalaya TMC-ni Vice President James S. Lyngdoh, social mediarango tol•e gipatgipa mandeni kosako Sukrobar salo badi ka•aha.
AITC-ni National General Secretary Abhishek Banerjee-ni bimingo tol•e Press Release tarie social mediarango gipatgipa manderangni kosako badi ka•aha.
Re•anggipa June 29 tariko re•baenggipa 2023 bilsini eleksino AITC doloni susana gita South Mawlai elekkao Vicky Dey aro Mawlai elekkao Patricia Mukhim sakgniko gnigipa listo parakataha ine tol•gipa Press Release-ko Social Mediarango gipatahachim. AITC-ni National General Secretary Abhishek Banerjee, June 29 tariko Meghalaya TMC Office-ko oprake on•na gita Shillong songjinmaona re•baani salo man•sina man•gijagipa manderang tol•gipa Press Release-ko tarie gipataha.
Ia obostani bidingo AITC dilgipa Cyber Cell-ni Officer incharge-ona re•ange Information and Technology Act, 2000-o pangchake badi ka•aha.
“Ian tol•gipa koborsa ong•a. Chingni TMC dolko mikbugipa mandesa TMC dolni bimingko nosto ka•na miksonge iandakgipa ja•kuko de•aha. Uamang, Shillong Times-ni Editor aro Padmashree Award-ko man•ne mingsinggipa, Patricia Mukhim-ni bimingko tol•e social mediao gipataha. Ian ra•chakna man•gijagipa kam ong•a” ine TMC dilgipa janapataha.
TMC dilgipani badi ka•e seatgipa lekkao janapatani gitade, ong•gijagipa koborko tol•e social mediarang gita gipatgipa mandeko ta•rake sandichina aro niam gita sasti on•china Cyber Cell-ni officer incharge-ko didiangaha.