Baghmara, July 1, 2022: Constitutional Rights Forum (CRF), Baghmara Nursing Training Centre-ko chalaiani bidingo ta•rake sandichina, Health Department-ni manderangko mol•molangaha.
CRF-ni u•iatani gitade, Baghmara Training Nursing Centre-ko 2014 bilsionin oprake on•a gri kam ka•na a•bachengaha. Ia Nursing Centre-ko re•anggipa May 16 tarikoni kam ka•gija galchipe donengaha. Uasan ong•aigija ia training centre-o kam ka•giparang dongsrangjaha ineba u•iataha.
Constitution Rights Forum-ni President Greneth M Sangma, iani bidingo sandianiko dakenba, Health and Family Welfare Department-ni Director-na Sukrobal salo lekka sedoataha. Greneth Sangma-ni janapatani gitade, bang•a skul aro kolegerang ia bilsi a•bachengaoni offline klasrangko ra•e, porikka ko offline gitasa seaha, indiba ia training centre sorkarini ge•etaniko manigija porikka ong•aona kingking online klasrangko ra•angkuaha ine u•iataha.
“Bijoli tik ong•jani a•sel Baghmara songjinma aro pilak SGH a•jao songdongenggipa manderang neng•nikanirangko chagrongenga. Indiba Nursing Training Centre-o skigiparang ia obostani bidingo maming chanchigija an•tangtangni namgnina aro re•na dona nanggijako sandie online klasrangko ra•angkua. Indake Department-ni manderang a•a nokgipa baksa agangolpoe ku•chakgimin kattarangko da•onaba bimang pil•atkuja. Indake ia Nursing Training Centre-ko rikna a•ako indin ong•genchimode nokni mande saksako kamo rakkigen ine ku•chakachim, indiba uamang ku•chakatangko gelaha” ine Greneth Sangma janapataha.
Uni gimin Department-ni manderang ia Nursing Centre-ko chipenba skie ra•enggipa Trainee-rangko gipin institute-rang baksa chapatchina, ong•jaode, sorkarini ge•eta gita offline klasrangko ra•angchina didiangaha. Unbaksana a•a nokgipa a•atangko ra•pilna skang una ku•rachakgimin kamko on•na nanga. Department-ni manderang kamtangko maming dakeba dal•en ra•ja aro an•tangtangni namgninasa rikbata ineba ua agandapaha.