MMSA chi bananio duko ga•akenggipa songni manderangna relief-ni bosturangko ra•ange on•nea
Bagmara, July 4: Meghalaya Medical Service Association (MMSA), re•anggipa June 16-oni 17-ona mikka dondikgija wae chi bananichi nok-jam gri, cha•a-ringa gri aro ganna-chinna gri duko ga•akenggipa manderangna relief-ni bosturangko Sombar salo on•nangaha. MMSA-ni suale on•anggipa bosturanga ba•ra chola, mosori, me•dik-samdik aro chi chekchakani-rangko ra•ange on•angaha.
MMSA-ni u•iatani gitade, re•anggipa June 28 tariko Siju-o Medical Camp-ko ong•atangaha aro June 30 tariko Rongara-o ong•atangskaha ine u•iataha. Maina ia biaprangan chi bannanio bilongbatgipa songrang ong•achim. Mitam bosturangko Mahadeo aro Moheshkola-ona watataha, indiba ja•achi re•angna nangani gimin ua biapona sokangna konta 6-7-rang nangani a•sel bang•e sokatna gita man•jaha ineba u•iataha.
Unbaksana, West Garo Hills aro South Garo Hills-ni Dokdor-rang aro gipin ka•rimskarang duko ga•akenggipa manderangna on•gilaniko dakangpaaha.
Una agreba MMSA songimikko chi man•pakange dukko man•enggipa Kalu songni manderangna relief-ni bosturangko on•angen ineba parakataha.