Williamnagar, July 26, 2022: Meghalaya a•doko gital atchigipa Janata Dal United (JD-U) dol uamangni skanggipa tom•aniko Sonibar salo Williamnagar Tourist Lodge-o ong•atangaha. Ia tom•anio Garo Hills-ni bang•a dilgiparang bakko ra•angaha aro a•dokni President Robinus T Sangma jean re•baenggipa 2023 bilsini MLA eleksino susana am•engachim ua ong•atangaha.
Ia tom•anio a•dokni State Co-ordinator, JD (U)-ni Executive Membor ko ua rimchaksoaha, unbaksana Arunachal State-ni President, Ruhi Tagung-ko mongsonggipa sokgipa ong•e okamataha.
JD (U) dol re•baenggipa 2023 bilsio Dadenggre elekkao susana mandekoba seokangaha ine u•iataha.
Arunachal Pradesh-ni State President, Ruhi Tagung JD (U) dolni gimin jinmana agantalate on•angaha. Uni agantalatani gitade, Janata Dal (United) dolko Kristian saksa George Mathew Fernandez uni tangengmiting somoio bikote donangaha. Sharad Yadav aro Nitish Kumar jean Bihar-ni Skotong Minister ong•engachim, uamang ia dolni Co-founder ong•achim. Indake JD (U) dolko 2003 bilsini October 30 tariko bikotaha.
George Fernandez saksa Gitcham seminaryan ong•a jean Pamong ong•na poraiachim, indiba bon•kame ua Mumbai-o “Socialist Trade Union Movement” o bakko ra•aha. Ua Trade Union-ni dilgipa ong•e kamko ka•engon, ua Bombay songjinmao bang•a jingjengatanirangko aro bandh-rangko ong•ate, 1967 bilsini Parliamentary eleksino INC-ni candidate SK Patil-ko amchepaha. Ua bang•a portfolio-rang jekai Communication, Railways, Industry aro Defence Minister-ko jakko ra•e kamko ka•aha. Ua saksa ga•subegipa bilak wa•sagipa Politician ong•an baksana nambegipa Kristianba ong•a ine Ruhi Tagung aganangaha.
Kristian dilgipasan ong•aigija JD (U) dolo Hindu, Muslim aro rokomanti toromni dilgiparang donga. JD (U) dol toromni aro jatni a•sel an•tangtangko dingtang ine chanchitokja, indiba uamang JD (U) dolo donge pilakan apsan chanchie jinma ku•mong nangrime kamrangko ka•ronga. Apsandaken JD (U) dol Meghalaya a•doko darangkoba mikkang nitegija kakketo kamko ka•anggen ine parakangaha.
“Socialism, Secularism aro Humanism-ko ja•rike JD (U) kamrangko ka•enga. Ia dolona a•dokni bang•a dilgiparang aro chadamberang kusi ong•e naptokaha. Uni gimin ta•raken na•simang Office-o kamrangko ka•angna manderangko seokanggnok. Indake darangkoba galongija aro mikkang nitegija, pilakon apsan ong•e jakkalanian chegipa ong•gen” ineba ua agandapangaha.