Bernard Marak kangalrangni tangkarangko ta•rake on•china Skotong Minister-ko didiata
Tura, Dec 28, 2022: A•dokni Skotong Minister FOCUS aro FOCUS+ ni ning•o tangka gong 5000-ko nokprakna on•na man•ode, me•chikrangni gipin Scheme-rangkoba ta•rake kangal cholgrirangna on•na nanga ine BJP Spokesperson aro Tura-ni MDC Bernard N.Marak didiataha.
Kangal cholgrirangko ong•gija kal•ake aro duk mikchi ong•ate ronna nangja, uamangko mande ra•na nanga. Meghalaya a•dokko dilchina Conrad Sangma-na Skotong Minister Post-ko BJP-sa on•aha, uni gimin Conrad Sangma ma•sina nanga, “Antyodaya” ian BJP-ni mongsonggipa Scheme-rangko ra•gatna miksongani ong•a.
Karyakarta ian BJP dolni dilgiparang an•tangtangko on•kange kam ka•ani ong•a, kangal cholgrirangko darang saksakoba watchanggija aro mikkang nitegija Scheme-rangko on•na miksongani ong•a. BJP mikkangchi songsalni manderangko saksakoba watchanggija minggipin scheme-rang aro namgnirangko on•angkugen.
Prime Minister-ni on•atgipa KISAN Beneficiaries ba game cha•giparangna dakchakani ba Farmers’ Scheme-ko Meghalaya a•doko gipin gipin Scheme-rangona divert ka•e tangkarangko gipin kamna jakkale, bilsi 3-na kingking game cha•giparangni account-rango tangkarang napjaha ine Bernard Marak parakataha.
Prime Minister-ni game cha•giparangna ku•rachakgimin man•gnirangko a•dok sorkari, sorkari Officer-rang aro Minister-rang da•onaba on•kuja. Ma•mong sorkari bang•a dingtang dingtang Scheme-rang aro program-rangni gita Producer Group (PG)-rangna on•atgipa tangkarangko FOCUS aro FOCUS+ ona convert ka•e, Conrad Sangma da•o election-na skang nokprako tangka gong 5000-ko suale on•skaenga, uni a•sel jemangan PM KISAN Card dongachim, da•onaba jakrara ong•tokenga ine Bernard Marak MDA sorkarini kamko matnangaha.
NPP-chi dilenggipa MDA sorkari Meghalaya a•doko BJP sorkarini ning•o Narendra Modi-ni dilaniko ja•rikenga. Indiba ning•tuen so•sojengjeng ong•anirang aro sera bera ong•anirang bang•en donga. Uni gimin Meghalaya BJP iandakgipa kamrangko namedake ma•sina gita RTI-rangko ka•aha aro aganchakaniko sengsoenga.
“Chinga ka•donga bang•a donuanirangko RTI-o parakgen. Chinga BJP-ni dilgiparang indakgipa kamrangko aro chingni kangal cholgrirangna on•enggipa scheme-rangko ong•gija kamna jakkalaniko maming saloba nie dongjawa. Antyodaya ian chingni miksongani ong•a, kangal cholgrirang darangkoba duk on•ne aro kal•ake rona man•jawa. Pilak Scheme-rangkon, sakanti kangal cholgrirangna pilak political dilgiparang joltangtango sokate on•na nangchongmota, darangkoba mikkang nitena nangjawa. Uni gimin Skotong Minister Conrad Sangma kangal cholgrirangna on•atgipa tangkarangko ta•rake on•atna nanga” ine Bernard Marak mol•molataha.