Tura, June 12, 2022: Meghalaya-ni State Planning Board (SPB)-ni Co-Chairman Ian Bontham K Sangma South West Garo Hills a•jaona re•ange re•anggipa June 9 tariko jimbee mikka wae chi bana re•e chi dubiako man•ne dukko man•enggipa songni manderangna dakchakaniko on•angaha.
Unbaksa Betasing C&RD Block-ni BDO, Leena Daring Sangma-ba Co-Chairman baksa Ampati Civil Hospital-ona re•ange, a•a rudapako man•ne sknae dongenggipa me•chikmako grongeaha. Co-chairman saknae dongenggipa me•chikma aro uni nokdangni manderang jemangan Bristibar pringo a•a rudape bi•sa saksani janggiko gimaatahachim, uamangna ka•dimeaniko on•an baksana ex-gratia-ko on•angjolaha.
Una agreba ua Zikzak C&RD Block aro Darong A•du songonaba re•ange sing•sandianiko dakangaha. Indake duko ga•akenggipa nokdangni manderangko gronge, uamangna sorkarini gita on•enggipa chu•gimik dakchakaniko on•na gita kamko ka•anggen ine parakangaha.