Tura, 7 April 2022 : South West Garo Hills a·jao donggipa Mellim, Okkapara aro Agasigre song a·pal jatchio donggipa Sokchipak chiringni Dollong namjani a·sel salanti gari gora salruraenggipa manderang namen neng·nikaniko man·enga ine u·iataha.
Ua dollongko 2000 bilsina skangan bolchi rikgipa ong·achim, uan skangode Rangsakona elakkani ning•o ong·achim, indiba da·ode Gambegre elakkni ning•o chapatako man·aha ineba u·iataha.
Ua dollongan Mellim jol gimikni mongsonggipa Tura Garobadha aro una agre Assam-ona najoke re·na man•gipa mongsonggipa ramaba ong·achim, ua dollong namjaani gimin dollong ka•ma gita Subway tarigipa rama mikkarang jimme waanichi dal·a gari ga•batna man·jaenga ineba u·iataha.
Ua dollong namjaani a·selan salantio skul aro kolege re·giparang, bading chiwale janggi tanggipa, aro dingtang dingtang nanganirangna re·rura·gipa manderang namen neng·nikaniko man·enga.Uni gimin ua dollongko ta·rake tarie on·pachina sorkariko saksa didiataha.