Tura, November 4, 2022: A•chik Holistic Awakening Movement (AHAM) Bawagre Sub-Unit, Dadenggre Civil Sub-Division-ni Medical & Health Officer-na lekka sedoate, Bawagre songo Sub-Centre-ko songe on•china dabiangaha.
“West Garo Hills a•jani Raksamgre Sub-Division-ni ning•o donggipa Bawagre songo da•ona kingkingba Sub-Centre dongkujaenga. Uni gimin Songo noko sanna bannako dakna gita Sub-Centre rang donggenchimode songni manderangna namen dakchakbeani ong•gen. An•ching pilak bi•sarang, chadamberang, buchuma budeparang saa ding•anirangko man•ronga, indakmiting somoio Sub-Centre-rang dongode saenggipa manderangna bang•a dakchakani ong•genchim. Uni gimin Bawagre songo Sub-Centre-ko songe on•china AHAM dabiangaha.
Ua jolo donggipa bang•a songrang jekai Nengbapara, Uringgre, Ajurigre, Tosinpara, Rongmakgre, Angke Rongdikgre, Dildegre, Songgitalgre, Songgitchamgre, Jengritgre aro gipin songni manderangna dakchakani ong•gen. Songni manderang saa ding•ani somoirango, Tikrikkila Community Health Centre (CHC)-ona re•angesa sanna bananiko dakna nangenga” ine janapataha.
AHAM, Bawagre Sub-Unit songni manderangna namgniko on•na man•na gita Sub-Centre-ko ta•rake songe on•na nanga ineba dabiangaha.