CM, WJH-o FOCUS+ YESS program aro PROGRESS scheme-ni tangkarangko sualanga

Shillong, November 4, 2022: Meghalaya a•dokni Skotong Minister Pa Conrad Sangma Bristibar salo West Jaintia Hills a•jani Laskein Block-ni ning•o donggipa Raliang songni manderangna tangka paisarang aro jilanirangko suale on•angaha.

Koborna parakatani gitade, FOCUS+ Program-ni gita Skotong Minister Conrad Sangma ge 207 game ge•e cha•enggipa nokdangni manderangna tangka gong lak 2 hajar 7 tangkarangko suale on•angaha. FOCUS+ Program-ni gitaba MDA sorkari game ge•e cha•giparangna tangka paisarangko sokate dakchakaniko on•na jotton ka•enga. Ia program-o game ge•e cha•giparangna bang•bate dakchakaniko on•enga. FOCUS aro FOCUS+ ia ge•gni program-rang game ge•e gamme cha•enggipa nokdangrangna gong hajar 10 tangkarangko on•ne dakchakaniko on•enga ineba parakataha.

Laskein Block-ni Self Help Group (SHG) dol 10-na Community Investment Fund (CIF)-ni gita gong lak 61 hajal 80 tangkarangko pakwate on•angaha. Uasan ong•aigija, YESS Program-ni gitaba dol ge 13 chadamberangna gong lak 5 hajar 40 tangkarangko suale on•angjolaha.

Unbaksana, PROGRESS scheme-ni gitaba, Skotong Minister mang 40 wak bi•sarangko nokdang ge 10-ni manderangna (bima mang 3 bipa mang 1) wak bi•sarangko suale on•angaha.

Skotong Minister Conrad Sangma jinmana aganprakengon, “Chinga West Jaintia Hills a•jani manderangna dingtang dingtang program-rangni gita songni manderangna dakchakaniko on•na man•ani gimin bilongen kusi ong•a. Chinga MDA sorkari a•doko game ge•e cha•enggiparangna dakchakaniko on•na raken kamrangko ka•enga. Batanggimin bilsi 4 ja dokni gisepo chinga MDA sorkari bang•a program-rangko ra•gate kamrangko ka•ani a•sel a•doko rokomanti award-rangko ba upatirangko man•aha. Ian an•chingna kusi ong•beani aro katchabeani ong•a” ine Skotong Minister aganangaha.