Tura, June 14, 2022: All Garo Hills SSA School Teachers’ Association (AGHSSASTA) Skotong Minister Conrad Sangma-na lekka sedoataha.
SSA skigiparangni janapatani gitade, re•anggipa February jaoni da•alona kingkingba skigiparangni dormaharangko on•kuja ine janapataha.
“Chinga Meghalaya a•dokni Samagra Shiksha Abhiyan (SSA) skulo skigiparang, February jaoni da•alonaba dormaharangko man•kujaenga. Chinga ja brina kingking dormaha gri rona nangenga. Chinga batanggimin bilsirango dormaharangko tik ong•e on•jagenchimoba skulni bi•sarangna ka•sae skulo dangdike skie on•ronga. Chinga dormaharangko somoi gita man•jani gimin a•dokni Education Minister Lakhmen Rymbui-na changni chang lekka sedoataha, indiba da•alona kingkingba maming koborko chingna sokatchipja” ine janapataha.
SSA skulo skigiparang pangnan dormaharangni bidingo neng•nikaniko man•ronga. “Chinga pangna bilsian apsan obostako chagrongna nangronga. Chingni dedrang jadokni porikka a•bachengna sepangengjok, iani a•selo chinga skul fee-rangko gamna nangenga, indiba dormaharangko ja 4-na kingkingba man•jagenchimode, chingara maidake skul ka•gen aro maidake skulni fee-rangkoba gamgen. Bang•a SSA skulo skigiparangni dedrangrang SSLC aro HSSLC porikkako pass ka•tokaha, indiba dormaha man•jae detangna admission ka•e on•na gita man•jaenga. Chinga salantini nanganirangna dormaha man•jae, bang•a neng•nikanirangko chagrongna nangenga. Chingni dabianirangko sorkari June jani 22 tarikna skang chu•sokatjagenchimode, dal•a jingjengatanirangko ong•atanggen ineba parakataha.