Tura, June 14, 2022: West Garo Hills a•jao Mason Phillips Hall, Tura Baptist Mondolini bakrao World Donor Day-ko gisik ra•angaha.
Ia manianiko Meghalaya Aids Control Society, State Blood Transfusion Council, Blood Centre Tura Civil Hospital aro Krima nombor 4-ni chadamberang baksa apsan bakrime ong•atangaha.
Indake World Blood Donor Day-ko maniani salo West Garo Hills a•jani Deputy Commissioner, Swapnil Tembe-ba bakko ra•e an•chi on•gilangaha.
“An•chi on•gilaniko pangnan ong•atjringna nanga, jedakode on•gimin an•chirangko nangenggipa manderangna jakkalangna man•gen. An•chi on•chakani bidingo bang•a skul aro kolege-rangchi re•ange mikkrakatani program-rangko ong•atna nanga. Jedakode uamang an•chi on•chakanichi nanganirangko u•igen aro tol•e agananirangko bebe ra•gija ka•donge an•chitangko on•anggen” ine DC aganangaha.