Tura, April 23, 2022: A•chik Youth Welfare Organization (AYWO) CEC, HQ Tura a•dokni Skotong Minister Conrad Sangma aro Assam a•dokni Skotong Minister Himanta Biswa Sarma-ni soi ka•gimin Memorandum of Understanding (MoU)-ko raken jegalataha.
Sorkari MoU-ko changsatai nipiltaina nangchongmota ine AYWO dabiangaha.
“MoU-o soi ka•e Meghalaya a•dokni sima ari jolo donggipa bang•a songrangko Assam a•dokna pakwataniara kraani ong•chongmotja. Skotong Minister Conrad Sangma MoU-ko soi ka•na skang songni manderang baksa agangolpogrika dongja. Pakwatako man•gipa songni pilak manderang duk mikchi ong•e ka•a be•na nangao ga•akenga. Uamang 1972 bilsionin Meghalaya a•doko songdong a•chae janggi tangbaenggipa manderang da•o rang•gitik Assam a•dokna pakwate galaniko man•aniara kraani aro ra•chakna man•gijani kam ong•a. Batanggimin salrango Conrad Sangma kobor ra•timgiparangna, MoU-ko nipiltaina aro taripilna man•jawa ine aganaha. Ian jinmani nikanio ra•chakna man•gijagipa kam ong•chongmota. Ua an•tangni chanchianikosan ong•nike, an•tangni namgnina Delhi-chi re•ange MoU-o soi ka•eha, indide uko nipiltaie an•tangni gualaniko namatpilna maikai man•ja? Conrad Sangma maming mikkang janggil nigija aro chanchigija Assam-ni CM hoe inana hoe ine dongaiode ong•jawa.A•a nokgipao sing•cheng sanchenggija a•arangko skatang gipinna pakwate on•aiaode darangba namnikjawa aro a•atangna warachakna sikaigen” ine AYWO-ni Assistant General Secretary Alexander D Sangma janapataha.
KHADC-ni Executive Membor, Jambor War-ni aganani gitade, Regional Committee gimikna chanchie tarigim report-ko MoU-o ming•sakoba ra•gatjaha, sorkari indinari Regional Committee-ni membor-rangko okamate report tarimike uamangko mitino cha•bokaha.
Meghalaya a•dok sorkari indakgipa dal•a ja•kuko de•na skang darang mandeni ku•pattianiko ra•chakjaha. Indakgipa kamrangko nigrike aro jinmani dabianiko knachake sorkari changsatai MoU-ko jatni namgnina nipiltaina nanga ineba dabiangaha.