A•dokni dilgiparang ADC-na on•atenggipa tangkarangko jakkalsretenga:Bernard

By Kosi Songbad Editor On Mar 1, 2022

Tura, March 1, 2022: Meghalaya a•dokni Minister-rang ma•mong sorkariko cha•minoke aro a•songni niam retti-rangko nosto ka•e Autonomous District Council (ADC)-ona sokbaenggipa Rural Local Bodies (RLB)-ko namdapatna dingtangmancha on•atgipa tangkarangko an•tangtangnasa salope ra•na jotton ka•enga ine Tura-ni BJP MDC, Berard N.Marak parakataha.
Bernard Marak-ni janapatani gitade, RLB-na nangchongmotgipa grant-rangko Autonomous District Council (ADC)-ona 15-gipa Finance Commission (FC)-oni sokbana siengani gimin a•dok sorkari ching•chaenga ine Union Minister-na chitti seate janapataha. Union Minister, a•dok sorkarini VEC-ona fund-rangko sokatchina chanchianiko ma•mong sorkari ra•chakjaha, maina ma•mong sorkari fund-rangko ADC-onasa chamatenga. A•dok sorkari ADC -ni bilakdapaniko champengna ADC-ni ning•o ong•enggipa obostarangko darkdraenga ineba janapataha.
Meghalaya a•dokni Minister-rang ADC-ni tangkarangko ra•sekdrae ra•na am•aniko Rural Development-ni Union Minister-na seatgipa chittiko nike ma•sina gita man•aha.
A•dokni Minister saksa Rural Development-ni Union Minister-na seatgipa chittio janapatengon,”Meghalaya a•dok Sixth Schedule-ni ning•o donggipa a•dok ong•a aro a•dokni niam retti-rangko tangbange rakkina Autonomous District Council (ADC)-ba donga. Autonomous District Council jatni niam retti-rangko ripinge rakkian baksana, a•dok chigako nirok simsakgipa aro bading chiwalanirangko nirok sandie a•ani bidingo kajia golmal ong•ani somoio obostako sing•sandie kakket raiko on•na bil gnang. A•songni 93-gipa Amendment-o seanirang, Nokmachi sason ka•enggipa songrangna maming dakeba nangeja” ine janapa gnang.
Chittini gnigipa paragraph-o, “A•dok sorkari ADC-ni tang•doanio dingtanganiko nike chasongni kri gital chasongo gitcham daka rikani bewalrangko apsan brinne an•tangni raio pangchakgipa niamko NREGA-ni gita tarie on•aha. ADC a•doko sildap namdapaniko aro tang•doaniko ra•bajani gimin a•dok sorkari MGNREGA donggipa songrango Village Employment Council (VEC)-ko ra•gate on•angskana chanchirimangaha” ineba janapataha.
Uni seatgipa chittio janapataniko nike ADC-ko bilgrigipa aro maming tang•dodapataniko ra•bagijagipa ine aganenba a•doko VEC-ko ra•bana jotton ka•aniko nikna gita man•aha.
A•dok sorkari VEC-ni gita manderangna kamrangko on•ne dakchakaniko on•enga ine agana, indiba ian ong•chongmot ong•ja, VEC-ni niam gita re•gipa ong•ja indiba politically re•gipasa ong•a. VEC-o maming eleksin gri mandetangko seokan baksana manderangko kam ka•ate uamangni hajirakoba on•chipja aro uamangni account-ko ma•mong sorkariona sokangatchipja. Songni manderangna hajirako uamangni account-tangtangona chipe on•ja, indiba VEC-ni Secretary-sa tangkarangko biming segatani aro ka•na nanggni kamrangko sason ka•a.
Indakgipa kamrangchin an•ching sorkarini ADC-ona 15-gipa Finance Commission-ni sokatgipa tangkarang aro grant-rangko ra•sekdrana am•enga ineba janapataha.
Natanggimin 2014 bilsio dolgni ANVC aro ANVC(B)-ni melie soi ka•e, see jote dongipa Agreed Text for Settlement (ATS)-ni para 7.3,7.4,7.5,7.6,9.3-o,” tangkarangko VEC-na ong•ja, indiba ADC-onasa a•dokko tang•dodapatna aro silrorodapatna sokatna nanga” ine janapaha. Indiba a•dok sorkari ADC-ko bilakdapatna tarigipa ATS-ko jegale an•tangni nangnikakosa dakna am•aia ineba Tura-ni MDC janapataha.