AAYF Betasing Regional Unit, a•jani Deputy Commissioner-na lekka sedoata
Ampati, June 1, 2022: All A•chik Youth Federation ( AAYF) Betasing Regional Unit, South Western Zone, songdongenggipa manderangni namgnina South West Garo Hills a•jani ning•o niamgri ita tarianirangko chu•gimik dontongatchina ba champengatchina a•jani Deputy Commissioner-na Monggolbar salo lekka sedoangaha.
AAYF dilgiparangni Koborna u•iatani gitade, niam gri dam 15 itarangko tarienggipa songranga Ichaguri, Thakuranbari, Talbari aro Monabari jean South Garo Hills a•jani ning•o ga•akachim, ia songrango dontonggija itarangko tarianichi jolni manderangna neng•nikaniko on•enga.
“Chinga changni chang ita tarienggipa nokgiparangna lekka seate ita tarirangko dontongchina u•iatahachim. Indiba uamang manigija drae itarangko taripilenga. Uamangni kosako sorkarini gita darangba sadiange champengata aro action ra•a dongjani gimin, uamang jakgitele aro parake darangnaba kengija an•tangtangni namgnina niam gri itarangko tarie bading chiwalenga” ine AAYF Betasing Regional Unit-ni President Chesrang D.Sangma u•iataha.
Unbaksana, sorkari on•gipa lekkarang donggija song jatchio niamgri bol ratani ge-15 kolrangko chalaiengani a•sel, environment-na namgijako ra•baenga. A•jao niam gri bol ratani kolrangko jakkalenggipa songranga Majigre, Chigitchakgre, Adugre, Banduraja, Ampati Latrigre, Rangsakona Bangre, Chongpotgre Hajongpara, Mellim, Betasing, Darugre, Koligre aro Balughat ong•achim.
Ua kolrangko a•jatangni manderangan niam gri chalaienga aro maming license-rang gri South West Garo Hills a•jani Forest Department Office sepangon bol ratani kolrangko chalaienga ineba AAYF-ni dilgiparang u•iataha.
Una agreba niam gri salantian Garo Hills-ni bolrangko cha•ue gipin a•dokchina sima ari samba gita chalan ka•anirang batroroenga. Indake ma•sigija manderang an•tangtangni namgnina niam gri bolrangko cha•ue palsrukatengani a•sel bol wa•arang gimaroroange a•jao namgijagipa environment-ko ong•atenga ineba janapataha.
Indake ong•engon, Dimilgre songoni Aningpara songona dakanggipa PMGSY ramako tarigija galchipe donengani gimin, manderangni namgnina ia galchipe donenggipa ramako ta•rake nirokatpachina AAYF Betasing Regional Unit, South West Garo Hills a•jani Deputy Commissioner-ko mol•molangaha.
Kosako janapbagimin gita a•songni dongimin niam Para 1 & 2-ko pe•e ong•gija kamrangko ka•enggipa manderangni kosako Prevention and Control of Pollution Act 1981 aro Environment (Protection) Act 1986-o pangchake niam gita ja•kuko de•aniko dakenba niam pe•gipa manderangko niam gita sastiko on•china AAYF Betasing Regional Unit dabiangaha.