Tura, June 1, 2022: Re•anggipa somoio GHADC-ni CEM Rakesh Newar Sangma-ko A•chik A•song gimikni manderang jegalgrime CEM-ni chokkioniko ra•galaha.
Indiba ua re•baenggipa 2023 bilsini Assembly eleksino Gambegre elakkao MLA chakatna wenenga ine nikna man•a. A•chik jat uni re•dilaniko namnikjae uko jegalenba A•chik jatko re•dilna kraja ine jegalako man•oba ua tol•e vote-ko bi•amtaienga ine United Garo Peoples’ Forum (UGPF) HQ, Tura CEC-ni Chairman Togan Alparoh Chambugong Marak parakataha.
Rakesh Newar Sangma MLA chakatna dingtang dingtang songrangona re•roroe manderangko ropenga aro unbaksa susana am•enggipa manderangko chonnikerang aganenga, jeko aganode “bisong badita tangka bang•a, amchakode, angko dake nikan” ine ua songrango manderangna aganenga.
Jegitaba tangka bang•e on•china, indiba A•chik ong•gijagipa mande Gambegre ST elakkao uko jegalgen, gipin jatde ST biapo chakatna man•jawa, maina da•odipet Gambegre jolo donggipa manderang uni A•chik ong•ako name ma•sitokkuja.
“Chinga manderang baksa ku•monge jegalaniko dakna jolni manderangko gronggen. Rakesh Newar Sangma Gambegre elakkao MLA chakatbebeode, jolni manderangna mahari ma•nokna, ama ma•nokna chae mesokchenggen” ineba Togan Marak janapataha.
Indiba gipin jatko ST biapo chakatna on•jawa, jat raken jegalgen, uni mahariko aro toromko Gambegre jolni manderangna talate ba mesoke on•anggen.
Assembly-na susagenchimoba ST biapo gipin jat chakatna man•jawa. Uni gimin ua general seato chakatchina, seat ge•gni plain belto gnang uanosa gipin jatde chakatna man•gen ineba janapataha.
Indiba Gambegre elakkaode gipin jat chakatna man•jawa. A•chik asol ine Rakesh mesokna man•genchimode ua ST biapo ra•chakna man•gen, indiba jerangan A•chikni bewal, niam retiko name ma•sija, uko A•chik mingna kraja. A•chik jatni dakbewalko ja•rike aro daksiningesa jat baksa janggi tangna nanga. Rakesh Newar Sangma, indake dakgenchimode, ST biapo chakatna man•a, indiba Rakesh Newar Sangma A•chik ong•ani chinko jolni manderangna aro A•chik jatna parakna nanga ineba Togan Marak janapataha.
Rakesh Newar Sangma an•tangni maharikon changsa A.Sangma, ja•mano K. Sangma de•ode, sawa bebe ra•gen, ua A•chik jatko chonnika ong•engama ineba Togan Marak sing•doangaha.