GSU, Agalgre CHC-o neng•nikanirangko nirokatpachina Skotong Minister-ko mol•molata
Baghmara, July 3, 2022: Garo Students’ Union (GSU) Chokpot Regional Unit, Silkigre Unit aro Asugre Unit-ni dilgiparang Sukrobar salo Agalgre CHC-ona re•angenba sing•sandianiko dakangaha ine u•iataha.
GSU Silkigre Unit-ni General Secretary Chingkam Ch.Sangma-ni u•iatani gitade, Alagre CHC-o bang•a neng•nikanirangko man•enga ine nikna gita man•aha. Agalgre CHC-o kam ka•gipa staff-rangna dongchakani nok ba quater chu•onga gita dongja, je donggipaba noking selani gimin tarpuline-rangchi pindapesa tusienga. Una agreba X-Ray Machine, bijoli dongjae bilongen neng•nikaniko man•enga.
Iandakgipa obostarangko chagrongan baksana Dokdor chu•onggija hospitalko chalaienga. Ua hospitalo Chiba dongjaja, indaken sana bananiko dakenggipa aro saenggipa manderangna namen neng•nikbeani ong•enga.
Uni gimin a•dokni Skotong Minister Conrad K Sangma, Agalgre CHC-o man•enggipa neng•nikanirangko ta•rake nirokatpachina GSU mol•molataha.