Tura, May 23, 2022: Garo Students’ Union (GSU) CEC-HQ, Tura-ni dilgiparang Sombar salo West Garo Hills a•jani gital Deputy Commissioner (DC)-ko gronge uamangni segimin lekkako on•angaha.
GSU-CEC-ni DC-ko grongani miksongara, ru•uta bilsirangna galchipe donenggipa Tura Alotgre Stadium sepango donggipa sorkari ‘Youth Hostel’-ko gital dake rikpiltaichina DC-ko mol•molangaha.
GSU-ni see on•gipa chittio janapatani gitade, gipin biaprangoni Tura-ona dingtang dingtang kal•susaanirangko kal•na re•bagipa chadamberang, chatro chatrirang, gipin a•songoni biap a•dam nina re•baenggipa tourist-rang, Tura-o dongchakna biaprang chu•ongjae, neng•nikaniko man•enga aro dam raka hotelrango dongna nangenga. Uni gimin indin galchipe donenggipa sorkari Youth Hostel-ko ta•rake gital dake taripilchina janapataha.
Minggipin, Tura Chandmari-oni Tura Rongkon-ona chonbegipa apchangket soroko bang•en garirang a•sel ong•ronga, uni gimin ua sorokko apbalbate aro nambate tarichina gitaba GSU mol•molangaha. Maina ia sorok gitan Guwahati, Shillong, North Garo Hills, East Garo Hills gimikchi salanti chotchanggija re•ruraenggipa sorok dilmong ong•a aro Tura songjinmao mongsongbatgipa sorokba ong•a. Uni gimin garirangni a•sel ong•anirangko naljokatna ia sorokko ta•rake nirokatpachina GSU mol•moldapangaha.
Unbaksana, bang•a manderang chiringrang aro chibimarangchi re•ange, dingtang dingtang a•selrang ong•e janggitangtangko gimaatronga. Uni gimin, uandakgipa a•sel ong•aoniko naljokatna gita Tura Rongkhon aro Durama Kolege sepango galchipe donenggipa Swimming Pool-ko taripile on•china gitaba DC-ko mol•molangaha. Ia swimming pool-ko taripile on•genchimode, chadamberang, chatro chatrirang chiringrangchi re•anggija swimming pool-o ranta ka•e, somoiko re•atna man•gen. Uni gimin manderangni namgnina kosako janapgimin dabianirangko chu•sokate on•pachina GSU, West Garo Hills a•jani gital DC-ko mol•moldapangaha.
WGH a•jani gital DC office-o asonga antisasan ong•genchimoba, GSU Sombar salo gittikgittak DC-ko gronge golpogrikanio uni namgipa kattana GSU kusi ong•e, dingtangmacha DC-ko mittele uko rimchaksoan baksa mikkangchi jat aro a•songni namgnina kam ka•anirango bakrimpagen ine GSU-CEC-ni Assistant General Secretary Salman D.Sangma parakataha.