Tura-o ong•enggipa obostarangni bidingo GSU, WGH-ni DC-na lekka sedoanga 

0

Tura, May 24, 2022: GSU CEC, Zikku Balgra N.Marak-ni dilachi adita sak dilgiparang Sombar salo, West Garo Hills a•jani Deputy Commissioner, Swapnil Tembe-ko gronge, Tura songjinmao songdongenggipa manderangni chagrongenggipa dingtang dingtang neng•nikanirangko niroke kam ka•atchina mol•mole lekka sedoangaha.

Tura songjinmao songdongenggipa manderang mongsongbate skul aro kolege-rango poraienggipa chatro chatrirang, salo hajira kam ka•e cha•enggipa manderang re•a doanio neng•nikaniko man•jana gita Tura-o salruraengipa sorkarini garirangko on•dapchina GSU mol•molangaha.

Tura-o songdonggipa manderang re•a doanio altuna gita sorkari Public Transport Service (PTS)-ko on•ahachim, indiba, ia garirang manderangni nangnika gita kamrangko ka•jaenga. Uni gimin re•ruraenggipa manderang neng•nikaniko man•jana gita PTS-ni kamrangko nirokatchina GSU, WGH-ni DC-ko didiangaha.

Unbaksana, Tura songjinmao palenggipa be•en aro na•tokni damrang agrepile rakdugaengani gimin bree cha•enggipa manderang neng•nikaniko man•tokengani gimin be•en aro na•tokni damrangko namedake tik ka•e on•china gitaba GSU, DC-ko mol•molangaha.

GSU-CEC-ni janapatani gitade, re•anggipa bilsirango covid sabisina lockdown-ko ra•gatchengaoni Tura songjinma aro uni wilwilao donggipa bajar antirango be•en aro na•tokni damrang rakbatna a•bachengaha. Da•o covid sabisi namangahaoba, West Garo Hills-ni dingtang dingtang bajar antirango be•en aro na•tokni damrangko komiatkuja, batesa be•en aro na•tokni damrangko baririkrikatenga.

Uni gimin be•en aro na•tokrangko bree cha•enggipa manderang neng•nikaniko man•jana gita, be•en aro na•tokrangko palenggipa manderangni kosako ta•rake ja•ku de•aniko dakenba damrangko tik ka•e on•china GSU dabiangaha.

Leave A Reply

Your email address will not be published.