Tura, April 25, 2022: Chokpot-ni MLA, Lazarus Sangma, AITC dolni bang•a membor-rang eleksinna skang NPP dolchi napanggen ingipa kattako raken jegalataha.
Lazarus Sangma-ni parakatani gitade, “Bang•a Songbad-rango aro Social Media-rango janapatani gitade AITC dolni bang•a membor-rang eleksinna skang NPP dolchi napanggnok ingipa kattarang kakket ong•ja tol•gipasa ong•aia. NPP dolni membor-rang AITC dolni membor-rangkosan ong•aigija gipin dolni membor-rangkoba doltangona rimnapna jotton ka•enga. Je mandean doltangna ka•sae kakket ong•e kam ka•a uamangko maming dakeba illengatna man•jawa. A•dokni Skotong Minister Conrad Sangma, dostangko ra•chakna man•ja. Ua an•tang dosko dakgenchimoba gipinkosa jaksi ottaia. Sima ari jolo kajia golmal ong•ako namatna ua jinma baksa ku•mong melia gri MoU-o soi ka•aha, indiba jensalo manderang uni kamko ra•chakna man•jae jegaltokaha, ua gipinkosa jaksi otskaha. Conrad Sangma dilgipa ong•na kraja, uni kamko aro Dr. Mukul Sangma-ni kamko togrikatgenchimode, AITC dolni dilgipa Dr Mukul Sangma-an gimikni gitan dilgipa ong•na kraa. Chinga AITC dolni membor-rang namgipa dilgipako watgale Conrad Sangma-ni dolona da•aloba, knaloba aro mikkangchiba napjawa” ine Lazarus Sangma aganaha.
Gimikni gita niatgenchimode, Conrad Sangma a•dokko namdapatani pal batesa ong•siataha, Garo Hills-na ua maming namgniko ra•bajaha. Garo Hillso poraia skiani ba Education-ni gimin niatgenchimode, maming tang•dodapani dongja. Social media-rango aro Songbad-rango niksogipa, AITC dolni membor-rang NPP dolchi napanggnok, Babani jumang, aro Education-ko dal•bate ra•gen ingipa kattara tol•gramaigipasa ong•aia. Bilsi 4-na kingkingba Conrad Sangma an•tangni ku•mitchetarangko chu•sokatna man•jaha, batesa ua bilsina bilsi bang•e ku•mitcheta dake manderangko cha•bokenga.
Re•baenggipa 2023 bilsini eleksino Conrad Sangma an•tangni elekka South Tura-on chejawaha. Uni cha•bokanirangko aro tol•pinikanirangko pilakan mikrontangchin niktokaha ineba Sangma agandapataha.