CUET porikka o NCERT syllabus ni klas 12 ki•tap o pangchake sing•anggen

0

Shillong, April 25, 2022: Re•baenggipa July jao ong•atna sienggipa Central University Entrance Test (CUET)-o National Council of Educational Research and Training (NCERT)-ni Class 12 ki•tapo donggipa sing•anirangko sing•anggen ine u•iataha.
Indake ong•enggon, Meghalaya a•dokni bang•a Higher Secondary Skulrang MBOSE-ni Syllabus-kosa ja•riktoka aro skia. Central University-rango affiliate ka•gipa Kolege-rango napna gita poraienggipa sakanti chadamberangan CUET porikkako sena gita nanggen. India a•songo ge 44 Central University-rang gnang. Meghalaya a•doko Central University ge•sa mangmangsan dongaia, indake ong•genchimoba a•dokni bang•a chadamberang CUET porikkako sena gita nanggnok aro MBOSE-ni porikkako pass ka•an baksana CUET-ni porikkako pass ka•osa NEHU-o affiliate ka•gipa Kolege-rango admission man•gnok. A•dokni kona noksik jolrango donggipa chadamberang CUET porikkako sena tangka paisa bon•ne chel•bea biaprangona re•ange sena nanggnok ineba u•iataha.
CBSE Board-ni NCERT Syllabus-ko ja•rike skulo poraienggipa chadamberang CUET porikkako sena altue nikgen. ICSE board-ko ja•rikgipa chadamberangba NCERT ki•tapko poraijani a•sel neng•nikanirangko man•gen. CUET porikka Multiple choice question-rangsa ong•ani gimin aro Computer-osa sena nangani gimin bang•a chadamberang neng•nikanirangko man•ne Coaching klasrangko ra•na nangnaba gnang.
CUET porikkana Register ka•na gita NTA webportal-ona re•angna nanga aro ia Register ka•aniko May jani 6 tarikona kingking Register ka•na gita man•gen. Ia porikkako seani chongmot•gipa tarikko u•iatkujaenga, indiba July jani gnigipa antio ong•atanggen ine salko manchisoenga.
Meghalaya a•doko CUET porikkako sena gita Shillong aro Ri-Bhoi centre ge•gnisan dongaia, a•jao indake ong•anichi bang•a chadamberang neng•nikanirangko chagrongtokgen. CUET-na register ka•ani skanggipa antio Meghalaya a•dokni sak 193 chadamberang an•tangtangni bimingko segatangtokaha. CUET application process-ni gita, ia porikkako sena general category-o ga•akgipa chadamberang gong 650, OBC/EWS-o ga•akgipa chadberang gong 600, aro ST/SC category-o ga•akgipa chadamberang gong 550 tangkarangko game porikkako sena gita nanggen ineba u•iataha.

Leave A Reply

Your email address will not be published.