Tura, January 10, 2022: A•dokni Skotong Minister Conrad Sangma YESS scheme-na sokatgipa fund-rangko an•tangni Youth Wing-ko bilakdapatnasa jakkalenga ine Tura-ni MDC Bernard N.Marak u•iataha.
“Garo Hillsni bang•a chadamberang YESS Scheme-ni fund-rangko man•na nanggniko man•jaenga. Chadambe dolrang gong lak 1 tangkako YESS Scheme-ni gita man•na nangachim, indiba ua tangkarangko NPP dolni Youth Wing-ko bilakdapatnasa jakkalenga. NPP dolni Youth Wing re•anggipa Sonibar salo Club kulichina ge•etaha, indake uamang ge•etaniko man•e, District Administration-ni dakchakachi register ka•aha. Indake uamangko a•jani Rural Bank-o Account kulichina ge•etaha, jedakode uamang gong lak 1 tangkako uamangni account-o eleksin code of conduct-ko ra•gatna skang account-ona chipatna gita man•gen. Indake ia tangkarangko uamang eleksin-ni somoio vote-rangko brena jakkalanggen aro manderangna on•na chanchienga. Skangni register ka•gimin Club-rang ia Scheme-ni bidingo mamingkoba u•ija. Maikai NPP sorkarini Club-rangko Sonibar, salsani gisepon register ka•na gita man•aha? aro maikai Robibar salo uamang bank account-ko kulina gita man•aha? Club-rangko kulina aro register ka•na adita salrangko nanga, indiba NPP dolni Club-rang salsani gisepon register ka•na man•aia. Maina Conrad Sangma, ma•mong sorkarini chadamberangna chame on•atgipa fund-rangko doltangni manderangna jakkalenga? NPP dolni dilgiparang a•dokni chadamberangko cha•boke an•tangni dolko bilakatnasa kamko ka•enga” ine Bernard Marak parakataha.