Tura, Feb 11, 2023: MPYC-ni General Secretary aro Media Cordinator Te Junebirth C.Marak kobor ra•timgiparangni sing•anina aganchakengon, South Tura-ni election namen challenging ong•enga. Indiba ka•donga, South Tura-ni manderang skia man•giparang ong•ani gimin namen decisive ong•a aro namen basena changgiparang ong•a, uni gimin nambatako basee Congress candidate-ko cheatgen.
Congress-ni ka•donganide, kam ka•anio pangchaka, indiba cheani gimin agangenchimode, manderangni baseaniosa ong•a.
“Chinga South Tura-o chadamberangni gita bang•a gittimrangchin re•angjok aro bang•a polling station-rangon manderangni namgipa respond-rangko man•enga” ine Junebirth Marak aganaha.
Re•anggipa January jao adita sak Youth Congress ba chadamberang mai miksonganio doltangko wate katangaha ine sing•anina aganengon, “Skanggipao Youth Congress-de Youth Wing-sa ong•a aro Youth Wing-chi party-ko rikja, Youth Wing-de Party-ni High Command-ko dakchake on•gipasa ong•a. Uni gimin high command jeko decission ra•a, ukon re•na gita nanga, uni gisepon uamang high command-ni decission-ko ra•chakna man•jani a•sel uamang watangaha”.
“Bisong youth membor-rang katangani gimin, chinga dukde ong•a, maina darangkoba ong•katatna, sikja aro darangkoba party-oni ong•kate kam ka•ako namnikja. Indiba bisongni miksonga dingtang ong•ani gimin, bisongni sikaniko darangba ra•rikna gita man•ja” ineba Junbirth Marak aganaha.
Meghalaya Assembly-ni ge 60 seat-rangoni Garo Hills-o ge 24 seat-rang gimikkon, Congress target ka•enga aro kamkoba ka•engani gimin Garo Hills-on majority ong•na ka•dongsoenga ineba aganaha.