Tura, September 13, 2022: Womens’ Trading Organization (WTO), Tura Women Pulis Officer Jacintha S Marak-ni kosako badi ka•aha ine koborna parakataha.
WTO-ni parakatani gitade, Jacintha S Marak Tura PS Case No.156 (07) 22 u/s 447/448/506/34 IPC-ko jako ra•e kam ka•engachim. Uni jako ra•e kamko ka•enggipa mamlni bidingo statement-ko ra•na gita ma•giparangko salanti okamatenba dagrange ka•mikkenate roenga ine u•iataha.
” Unbaksana Tura Babupara gittimni saksa Changchang Marak, chingni kosako tol•e sakki on•enba badi ka•aha. Jekon Tura PS-o Case No.156 (07) 22 u/s 447/448/506/34 IPC-o pangchake segataha. Indiba pulis officer da•ona kingkingba badi ka•ani copy-ko chingna mesokujaenga. Changchang Marak-ni badi ka•anio janapani gitade, chinga WTO dol bading chiwalenggipa manderangko ka•mikkenate, niam gri dokkanrangona napdrae sing•sandianiko dakenba dokkan dakgiparangko noksan ong•atenga ine tol•e badi ka•aha. Uasan ong•aigija, chinga WTO-ni ka•rimskarangko biri aro ta•makkurangko niamgri champengenga ine tol•e matnangenba badi ka•hachim. Indake Changchang Marak-ni badi ka•aniko pulisrang mamla segate, chingko u/s 447/448/506/34 IPC-o pangchake dos galaha. Indake badi ka•aniko segatani ja•mano pulisrang sing•sandianiko a•bachengataha. Pulisrang CrPC Section 41A-o pangchake WTO-ni President, Monika Momin-na u•iataniko ba notice on•atenba uko niamgri PS-o ru•uta kontarangna donne ka•mikkennate dagrangaha. Re•anggipa July 26 tariko Monika Momin-ko pulisrang uni nokoniko sing•sandina rimbae, pulis stationo sing•sandianiko dakgija waltingona asongate donenba sastiko on•ne roaha. Uni gimin Monika Momin, High Court-o WP (C) No. 284-o pangchake petition-ko sedoani ja•mansa pulisrang uko ka•mikkenate roaniko dontongaha. Indiba Monika Momin-ko u/s CrPC 41A-o pangchake August 11 aro 12 tariko
I/O Jacintha Marak-ko grongechina ge•etaniko on•ataha. Ge•etaniko man•ne Monika Momin August 11 aro 12 tariko
I/O-ko grongna re•angon,
I/O Jacintha Marak, ua salo Tura PS-ona kamtangko ka•na re•bajaha. Indake ua maming u•iata gri Monika Momin-ko grongani salo an•tangni jakkalenggipa mobile phone-koba switch off ka•e kataha” ine WTO dolni ma•giparang parakataha.
Ia obostani bidingo July jaoni da•ona kingkingba Statement-ko ra•a matchotkujaenga. Uasan ong•aigija I/O Jacintha Marak WTO-ni dilgiparangko gisikni gita bang•a sinjetanirangko on•ne dongenga. “Chinga Jacintha Marak-ni kosako bang•a man•giparango sakkirang gnang. Chinga WTO-ni saksa ma•gipa Sumithi Sangma-ni depantekoba I/O dagrange ka•mikkenate roaha. Una agreba Sumithi Sangma-ko WTO-ni membor ong•e kamko ka•genchimode, Tura PS-ni pilak ka•rimskarang uni kosako ja•ku deanggen ine ka•mikennate dagrangaha. Uni gimin chinga WTO-ni President Monika Momin-ni bidingo talataniko on•atna sikenga. Chingni President dakait dakgipa ong•ja, manderangchiko tangka gilame cha•gipa ong•ja aro ua manderangko cha•bokgipaba ong•ja. Ua kakketko kamko ka•gipa saksa ong•a. Uni gimin chingni WTO dolko niamgri bobil dol ine chanchigenchimode, ian gualanisa ong•aia. Chinga I/O Jacintha Marak-ni kosako uni bilrangko ong•gija jakkalsretanina badi ka•aha” ineba parakataha.
Unbaksana uni kamrangko nigrike manderangni namgnina gital I/O-ko kamo rakkichina DGP-o WTO-ni ma•giparang dabiangaha.