GSU-CEC aro gipin NGO-rang tom•e chanchirima aro raka ja•kuko de•angna tik ka•a  

Tura, Sept 13, 2022:Garo Students’ Union (GSU) Centre Executive Committee (CEC), Headquarter Tura, dingtang dingtang GSU Unit-rang aro gipin Garo Hills-ni NGO-rang apsan bakrime re•anggipa September 9 tariko GSU Eastern Zone Office Williamnagar-o tom•e chanchirimaniko dakangaha.

Ia tom•anio bang•a membor-rang bako ra•e batanggimin salrango MeECL Office-ko picketing ka•anio chu•sokna man•jani gimin suk ong•gijaniko parakangtokenba mikkangchi rakbata ja•kurangko de•angna aro ong•gija donnue recruitment-rangko dake kam ka•teaniko jegale chu•onga gita kam ka•giparangko kamo rakkijaengani gimin dingtang dingtang jingjengatanirangko dake office picketing-rangko dakangkuna chanchianiko parakataha.

Unbaksana tom•anio jingjengatgipa dol ia September jaon Minister-ko gronge iani bidingo agangrikna chanchiangaha, uni gisepon uamangni dabianiko knachakja ong•ode, rakbatgipa ja•kurangko de•e, re•baenggipa October jao Garo Hills gimiko NCM-ko ong•atangna tik ka•angaha.

GSU-CEC, HQ Tura-ni President Zikku Balgra N.Marak-ni prakatani gitade, tom•anio batanggimin somoio MeECL department, Shillong Head Office-o Administrative Assistant-ni kamna advertisement ka•aniko raken jegalangaha.

Uni talata gitade, MeECL department niamgita ba procedure gita kamna advertise ka•gija, ning•il ning•il donnue sruk sruk kamna advertise ka•e kamo rakkienba Garo-rangoni saksakoba kamo rakkijaha aro Garorangna cholko on•jaha.

Indakgipa ning•il ning•il donnue kamni recruitement-ko ong•gija advertise ka•e kamo rakkisrukaniko maming dakeba ra•chakna man•jawa. Indakgipa donnuani kamara Meghalaya Job Reservation Policy-ni niamko pe•ani ong•a.

Uni gimin, ua advertisement-ko ta•rake ra•galpilna nanga aro ua kamna gital advertisement-o on•taina nanga, jedakode ua kamna je gadangoniba dorgasto galna man•gen ine GSU-CEC dabiangaha.