Tura, April 7, 2023: Womens’ Trading Organisation (WTO)-ni dilgiparang, Butbar salo GHADC-ni CEM Albinush R.Marak-ko gronge, uamangni dabie segimin memorandum-ko on•angaha.
WTO-ni CEM-na memorandum on•ani miksongara, Garo Hills-o niam gri bostu supply ka•anirangko champengatchina aro niam gri A•chik bading chiwalgiparangoniko kajina ra•aniko dontongatchina CEM-ko mol•molangaha.
WTO-ni seatgipa Memorandum-o janapatani gitade, Trading by Non-Tribals Regulation Act, 1957-ni Section 3-o Garo Hills District Council-ni pass ka•gimin niam gita, bading chiwalgipa gipin jatrang darangba tribal manderangni songdonggipa a•jao wholesale ba retailer-ko bading chiwalna ba bosturangko ra•bana man•jawa ine champengani gnang.
Bang•a bosturangko ra•baani Part “A” ba una batgipa bosturang Skanggipa Schedule-o darangba bang•bate bosturangko ra•bae badingna man•jawa ingipa Part B-o janapaha. Pangkamgipa bading chiwalaniko a•bachengani ba dikdiksana dokkan dakani ba hotelko chalaiani, cha dokkan dakani aro chi•gipa bosturang baksa cha dokkan dakani, bakery dokkan, tebil chokki tarie palani mingprakprako jinmana ma•siataniko on•na man•na gita advertisement-ko ka•na nanga.
Maiba bostu ba dingtangmancha bosturangko palna Executive Committee-ni ge•etako ba appoint ka•ako man•gipa, licencing officer-ni ning•o ge•etani gri licence-ko on•na man•ja.
Section 13 (1)-o janapa gita Garo Hills District-ni (trading by non-tribals), Brigipa Amendment Regulation Act, 1980-ni ning•oba talatani gnang. Ia Act-o pangchake je mandean gipin Schedule Tribe-ni songdonggipa a•jaona bosturangko ra•bae, licence gri bading chiwalengachim, dongimin niamo pangchake bading chiwalna man•jawa. Uko manigija niam pe•gipa manderang Magistrate-ni mikkango tangka gong 400-ko dai gamna nanggen, ong•jaode badingani bosturangko aro gipin mal gamko ra•sekna man•a aro Executive Committee-ni ge•eta gita bosturangko ra•seke jakkalna gita man•a.
WTO-ni dilgiparang Garo Hills-ni bang•a bakrango gipin jatrang jemangan songdongengachim, sakki gnang lekkako CEM-na on•angaha. Jeon uamang wholesale licence-ko man•ne, Garo Hills-o bading chiwalaniko dakengachim. Ia licence-rangko GHADC-ni bil gnanggipa officer-rang, dongimin niamko ja•rikgija gipin jatrangna on•aha. Section 3-gipa Garo Hills District Council, Regulation Act, 1958-ni No.1-o iani bidingo dingtangmancha janapgimin gnang.
Garo Hills District,Trading by Non-Tribals Regulation 1957 aro Section 13-ni kosako Garo Hills District, (Trading by Non-Tribals), Brigipa Amendment Regulation Act, 1980-o rongtale janapani gnang ine WTO-ni President Ma Monikha D Momin parakataha.
Uni gimin District Council-ni officer-rang ong•gija dake niam gri gipin jatrangna wholesale licence on•anirangko namedake sandienba dontongatchina WTO dabiangaha.
Unbaksana gipin jatrang jemangan bang•a bosturangko re•roroe tribal retailer-rangna supply ka•engachim, dongkamgipa tribal wholesaler-rangna namen neng•nikaniko man•enga aro songtango bading chiwalgiparangna noksan ong•skaenga ineba parakataha.
Uandake, WTO-ni dilgiparang ia ong•enggipa obostani bidingo name nirok sandianiko dakchina aro raka niamko ra•gate, dingtangmancha gipin jatrangna mikkrakataniko on•china aro wholesale licence on•aniko dontongchina gitaba mol•molangjolaha.
Una agreba a•paloni re•bae, bang•a bosturangko supply ka•enggipa manderangko dontongatchina aro uamangni bading chiwalanirangko niamo pangchake champengatchina WTO, CEM-ko didiangaha.
Indake ong•engon, Garo Hills-o gipin jatrangni bading chiwalanirangko champengatna gital niam ra•gataniko WTO nangnikja, indiba niam gita Section 3-gipa Garo Hills District (Trading by Non-Tribals) Regulation Act, 1957 aro Section 13-gipa Garo Hills District Council (Trading by Non-Tribals), Brigipa Amendment Regulation Act, 1980-o pangchake da•o jakkalenggipa niamrangkon ra•gatpilchina WTO dabiangaha.