Tura, April 7, 2023:West Garo Hills a•jani Deputy Commissioner Jagdish Chelani, Good Friday aro Easter Monday-ko maniani salo ge•etaniko ja•rike, a•palrango picnic cha•giparang simsake an•tangtangan mongsonggipa daitoko ra•e manipachina sakantikon mol•molataha.
Sakantian picnic cha•ani somoio pekgipa ringanirangko, ringe cha•e, kusi ong•e chi warirango aro chibimarango skatang jroe ba aue roaniko gelchina mikkrakatan baksa mol•molataha. Maina obostani kri mikkarang wae rang•gitik chibimang aro chiring chisikrang dal•bana ma•aia, uni gimin an•tangko aro gipinrangkoba naljokatna chibima rikamoni ba chisamoni komibeoba miter 50 chel•aosa picnic-rangko cha•na nanga ine Deputy Commissioner didiataha.
Unbaksana picnic cha•giparang, an•tangtangni jakkalgipa plastic cup-rang, chi bottle-rang, plate-rang, dingtang dingtang cham•gijagipa aro sogijagipa bosturangko picnic cha•gipa biaprango skatang galpajachina, jedakode an•tangtangnan namgni ong•gen ineba DC janapataha.
Uandake, jakkalgimin bosturangko sakantian simsake galgenchimode, namgipa environment-ko man•na dakchakani ong•gen. Uni gimin picnic cha•giparang, jabolrangko galchakani jolarangko ra•bitna nanga aro picnic cha•giparang sakgipinrangna chanchie, picnic cha•gipa biaprango gam•pretgipa doka dam•anirangko watgija sakgipinrangni neng•nikaniko aro chaktogijaniko ong•atpajachina gitaba DC mol•molataha.