Tura, June 15, 2022: Womens Trading Organization (WTO) HQ, Tura Budbar salo Monikha Momin-ni dilachi Garobadha Womens Trading Organization Unit-ko songe, dilgiparangko seokangjolaha.
WTO Garobadha Unit-ko songe on•ani miksongara Garobadha jolo bading chiwale cha•enggipa me•chikmarang bang•a neng•nikaniko chagrongengani gimin, uamangko dakchakna gita Unit-ko songaha.
WTO-ni President Monikha Momin-ni tom•anio jinmana aganangani hitade, Garo Hills-o bading chiwale janggi tangenggipa ma•giparang bang•a neng•nikaniko chagrongengani gimin, uamangko chel•chakna rake kamrangko ka•angna ia Organization-ko bikotaha. Mikkangchi WTO Garo Hills-ni kona noksik gimikon Unit-rangko songgen, uni gimin ma•giparang ia Organization-o bakrime mikkangchi apsan ku•monge kamrangko ka•angna gitaba mol•molangaha.
Jedakode, A•chik a•aongo neng•nikaniko man•enggipa ma•giparangna dakchakaniko on•na WTO raken ja•kurangko de•enga ineba ua agandapangaha. Unbaksana ua tom•anio bakko ra•gipa Garobadha jolni me•chikmarang kusi ong•e uamangko rimchaksoanina mittelpilani kattarangko aganangaha.