Tura, March 24, 2023: World Water Day-ko Tura songjinmani Mission Compound Field-o,dingtanganiko ra•bana aro rakbate kamrangko ka•angna ine katta bichongko donne maniangaha.
Ia manianiko West Garo Hills a•jani Public Health Engineering Department (PHE) ong•atangaha. Ia tom•anio jinmana aganprakengon, Deputy Commissioner Swapnil Tembe, chini gamchataniko aro uko simsake jakkalani bidingo aganangaha.
“District Administration, PHE Department aro bang•a Department-ni official-rang chiring chibisikrangko tangkame rakkina rakbee kamrangko ka•enga. Mikka wachi kario an•ching mikka chiko chake uni moilarangko rongtalate jakkalna gita man•gen, jekon Rain-Water Harvesting ineba agana. An•ching Public Tap-rangoniko chi jakkalengon, jakkalna nangmiting somoiosan tap-ko wate, jakkalna nangjamiting somoio tap-ko off ka•e donna nanga. Iako ja•rikanichi an•ching chiko skatang joke galaoniko naljokata” ine DC aganaha.
Unbaksana, dingtang dingtang activity-rango bakko ra•e chegipa bi•sarangna nama sikaniko on•angaha.
Tura Water Resources (WR) department-ni Executive Engineer Taddeus L R Marak, an•ching chirangko salantio nanganirangna jakkalan baksa uko tangkame rakkina nanga ine aganangaha”.
Meghalaya Basin Management Authority (MBMA)-ni DPM aro AGM Valentine Hembron jinmana aganengon, “Chiring chibisikko ripingna, songsalni pilak dakna nanggnirangko apsan ku•monge kam ka•angchina sakantikon didiangaha”.
JJM Tura Circle-ni Superentindent Engineer cum Member Secretary Ambrose D Sangma, Tura PHE Department-ni Executive Engineer Canning S R Marak, JJM Tura Circle ni DPM Brainygo K Marak tom•anio dongpae jinmana agan ku•pattiangaha.
Indake ia tom•anio mongsonggipa sokanggiparang aro gipin Officer-rang, activity-rango chegipa chadamberangna boksisrangko suale on•angjolaha.