ADE-ni dilgiparang Bolsal A•ding aro Bolsalgre, Govt LP Skulko niea 

0

Bagmara, Mar 24, 2023: Association For Democracy and Empowerment (ADE) Baghmara Zone, Sukrobar salo South Garo Hills a•jani ning•o donggipa Bolsal A•ding aro Bolsalgre LP Skul nokrang namsrangjani gimin, badi ka•e South Garo Hills a•jani Deputy Commissioner-na lekka sedoangaha.

ADE Baghmara Zone-ni General Secretary Tigana N.Sangma-ni u•iatani gitade, gittim ge•gnio donggipa Govt LP Skulko, ADE-ni dilgiparang re•ange nianio skul nokrang namsranggijani gimin ADE-ni dilgiparang gisiko suk ong•gijaniko parakataha.

Ua skul nokni tinrang dongjahani gimin Skulo poraienggipa bi•sarang namen neng•nikaniko man•enga aro asongchakani bench-rang dongsrangja ine nikna gita man•aha. Ua skulo bijoli, ringani chi dongja, paikanarang, doga kelkirangba namja aro skul noknan krajaha ine Tigana Sangma suk ong•gijaniko parakataha.

Bolsal A•ding LP Skulko 1988 bilsio Missionary-rang kuliaha aro uko 1997 bilsio sorkari jako ra•e, Govt LP Skulona ra•jitaha. Indiba da•alona kingkingba Education Department ia skulrangko nirok sandia dongja. Bolsal A•ding Govt. LP skulo Meghalaya a•dokni skangipa Skotong Minister, Captain Williamson A. Sangma poraiahachim ine gisik ra•atna gita man•aha.

Unbaksana Bolsalgre Govt LP Skul nokba mikka waode, skul nok namjani gimin skul ka•na gita man•ja, apsandaken poraienggipa bi•sarangni asongchakanirang namja, doga kelkirang, paikanarang, nokkingrang namja, ringani chiba dongja. Maina Govt LP Skulo poraigipa bi•sarangko Education Department galchipna nanga ine ADE-ni dilgiparang sing•doangaha.

Uni gimin ia skul nokrangko ta•rake nirok sandianiko dakpachina ADE, DC-ko mol•molangaha. Uni gisepon nirok simsakaniko dakjaode, mikangchi rakbata ja•kurangko de•e kamko ka•anggen ine ADE-ni dilgiparang parakataha.

Leave A Reply

Your email address will not be published.