Tura, May 23, 2022: Sombar salo Womens’ Trading Organisation (WTO)-ni General Meeting ba tom•bimonganiko Tura Mondoltila Community Hall-o ong•atanangaha.
Ia Womens Trading Organisation-ko re•anggipa 2021 bilsini September 22 tariko bikotaha aro ia Organisation-ko bikotani miksongara je A•chik ma•giparangan dingtang dingtang kamrangko ka•e cha•anio aro bading chiwale janggi tanganio bang•a neng•nikanirangko man•engani gimin, iano pangchake dingtang dingtang kamrangko ka•na aro ma•giparangni janggi tangani gadangko ra•dona ia Organisation-ko bikotaha ine WTO-ni President Monika D.Momin aganangaha.
Re•anggipa bilsio ia organisation-ko bikotahaoba sorkari approve ka•a gri maming dakeba kamrangko ka•na engtojani gimin, sorkarini certify ka•ako senge, ia bilsio certificate-ko man•ne, kamrangko ka•na a•bachengatgnok ineba aganangaha.
Maina A•chik ma•giparangni bading chiwale janggi tanganio bilongen neng•nikanirang donga. A•chik ma•giparangna batpile gipin jatrangan bang•a dingtang dingtang bosturangko supply ka•enga, uarangkosa ra•skae palna gita nangenga, uni gimin ma•giparang an•tangtangan pilak bosturangko ra•bae palskana gita nanggen. Gipin a•songni manderang maming lekkarang gri bosturangko ra•bae Garo Hills-ni dingtang dingtang bajar antirango palenga. Uarangko man•adipet champengna rake kamrangko ka•gen, jedakode A•chik ma•giparang an•tangtangan bosturangko ra•bae whole sale rate-o palskana man•gen.
Ia miksonganio dingtangmancha ia organisation-ko bikote kamrangko ka•na a•bachengataha ine Monika Momin agan talatangaha.
Indake ia tom•bimonganio adita chanchirimani ja•mano seokgimin WTO-ni dilgiparangko parakatangjolaha, uamanga Ma Monika Momin President, Ma Florence Marak Vice President, Ma Ripsera D.Sangma General Secretary, Ma Tripola Marak Joint Secretary, Ma Jabeny D.Sangma Accountant, Ma Maritha A.Sangma Treasurer, Dr Pilne A.Sangma aro Pa Nigam M.Marak Adviser, Pa Pijush R.Marak Legal Adviser (Ukil), Pa Ronald S.Sangma Auditor aro sak 10 Executive Membor-rang.