Tura, September 5, 2022: A•songni pilak skulrango skigiparangni salko manianga gitan, West Garo Hills a•jaoba chang 61-gipa Skigiparangni Sal ba Teachers Day-ko maniangaha. Ia maniaona North Tura-ni MLA aro Chief Minister-ni Adviser Thomas A.Sangma mongsonggipa sokgipa ong•e bakko ra•angaha. Unbaksana WGH a•jani Deputy Commissioner Swapnil Tembe, Tura Municipal Board-ni Chairman JD Sangma, District Skul Education Officer RK Sangma, Sub Divisional Skul Education Officer, Samuel Ch Marak, bang•a Department-ni Officer-rang, Award man•gipa Skigiparang, Principal-rang, Skulni Skigiparang aro poraienggipa chatro chatrirang bakko ra•angaha.
Award man•gipa skigiparangna namgipa skanirangko on•angengon, Thomas Sangma, “Skigiparangan chadamberangko nama janggi tanganiona dilbagiparang ong•a. Anga da•alo indakgipa gadangona sokgenchimoba iarang pilakan skigiparangni angko chonaoni skie dal•baatani a•selsa ong•a. Tura Public Skulo poraigipa saksa chadambe Petrov Marak, entrance porikkarango name dakenba Delhi-o donggipa mingsing minggamako mangipa, All India Institute Of Medical Sciences (AIIMS)-o admission man•angaha, uasan ong•aigija Babadam-oni saksa Talent M Sangma-ba rasong gnangbee Delhi-ni IIT University-o admission-ko man•eaha. Iarang pilakan skigiparangni chadamberangko nama ramao re•na skiani aro poraio name dakchina didiani a•selsa ong•a” ine kusi ong•aniko parakangaha.
West Garo Hills a•jani Deputy Commissioner Swapnil Tembe, “Skigiparang an•chingni songsalo dingtanganiko ra•baa. Skigiparang chadamberangna nama gunko suala. Poraia skianiosan ong•aija, indiba dingtang dingtang kamrango chadamberang changa sapaniko skie ra•na nanga” ine aganangaha.
WGH a•jao Award man•anggipa skigiparanga Montfort Skulni Assistant Teacher Manoj Kumar Prasad, Dobasipara Upper Primary Skulni Headmaster Frederick R Sangma, Balsrigittim LP Skulni Headmaster Miman M Sangma ong•achim.
Nambatgipa Scout Master Award-ko, Saljong Robin Crew-ni Bryan Lee Sangma man•angaha, Best Guide Captain Award-ko Rombagre Secondary Skulni Assistant Teacher aro Guide Captain Porsia A Marak man•angskaha.
Indake skigiparangni salko manianio bakko ra•na choljokjae sokbana man•pagijagiparanga Williamnagar District Science Supervisor Samuel K Sangma, Puri Dadenggre Higher Secondary Skulni Official Assistant Science Teacher Dr. Naldarin M Marak, Garodubi Higher Secondary Skulni Assistant Lecturer Abdur Hanif Chaudhary-na Thomas Sangma Award-ko on•angaha.
Award-ko man•anggipa saksa Frederick R Sangma, skigiparangni palo jinmana aganprakengon, “Anga Education Department-ko dingtangmancha ia award-ko pakwatanina mittelpilna sika, chinga mikkangchi re•baenggipa salrangoba chadamberangko nama ramao re•atna aro Nama skianiko on•na kamrangko ka•anggen ” ine aganangaha.
Bon•kameTura Music Academy aro Tura Public Skulni chatro chatrirang, tom•anio uamangni knatobegipa ku•rangchi ring•mittele on•angaha.