Wiiamnagar, September 6, 2022: 39-Resubelpara elakkani NPP dolna kam ka•enggipa, Polling Station dam 7-ni bang•a manderang September 5 tarik Sombar salo Meghalaya Pradesh Congress Committee (MPCC)-ni Secretary Ma Deborah C.Marak-ni dongenggipa nok Williamnagar Warima-ona re•bae Mass Enrollment-ko dakangaha ine Meghalaya Pradesh Youth Congress (MPYC)-ni Joint Secretary Junebirth C.Marak koborna u•iataha.
Junebirth Marak-ni u•iatani gitade, Ma Deborah Marak aro Congress dolni dilgiparang Resubelpara elakkani manderang Congress dolna ka•oksie, sorkariko rikenggipa NPP doloni ong•kate Congress dolo bakrimeanina kusi ong•bee rimchaksoaha aro namgipa agan ku•patianiko on•ne, mikkangchi Congress dolko bilakdapatna kamrangko ka•angna ku•mongrimangaha.