Tura, March 2, 2022: West Garo Hills Pencak Silat Association (WGHPSA) Martial Arts kal•susaaniko March 1 tarik Monggolbar salo skanggipa changna Skul chatro-chatrirangna Awareness Program-ko Tura Danakbandua Dakkopgre, Morning Glory Secondary Skulo ong•atangaha.
Batanggimin salrango Garo Hills-ni chadamberang dingtang dingtang National level-rango bakko ra•e Garo Hills ba Meghalaya a•dokna gold, silver, bronze medal-rangko man•bae a•dokna mikkim rasongko ra•baha.
Ia kal•susaniara Indonesia a•songni mongsonggipa Indigenous Sports Martial Arts (ISMA) Pencak Silat ong•achim aro Pencak Silat, Sports Martial Arts-ko India a•songoba (Sports Authority of India) Ministry Youth Affairs & Sports (Govt. of India)-oba recognised ong•gipa kal•susaani ong•engaha.
Uandake da•o ong•enggipa obostarango mongsongbate me•chikrang (self defence) ba an•tangko warachakna skie ra•ani ong•a aro mikkangchi kal•susaanio chu•sokgipa ong•e nama bewal ba (discipline)-o janggi tangna cholko man•gen ine Tura Dakkopgre, Danakbandua Morning Glory Secondary school-ni Principal Dorothy M Marak parakatenba an•tangni Skulo skie on•aniko nangnike class ra•na skang Awareness Program-ko ong•atchengaha.
Ua program-ona WGHPSA-ni President Eddy D Marak, General Secretary Tengsal A Sangma, Adviser Rakkan M Sangma, Vice President Kenny Kelly B Marak, Join Secretary Sengkubirth B Marak aro Skulni Principal Dorothy Marak, Skigiparang aro Chatro-Chatrirang dongpae bakko ra•angaha. Indake West Garo Hills Pencak Silat Association-ni President aro Chief Technical Director Eddy D Marak, programo mongsonggipa ong•e, Pencak Silat ba Sports kal•susaani namggnirangko talate on•angaha. Kal•susaanio je chatro-chatrirangan bak ra•engachim gisiko nange aro bimchipe janggi tangna cholko man•na gita nama Discipline-o re•mikangchina didiangaha.
Unbaksana mikkangchi dingtang dingtang National level, skul aro kolej levelrangni chatro-chatrirang namnikode bak ra•na gita man•gen ineba WGHPSA-ni President aganangaha.
Uni gimin je skulrangan iandakgipa kal•anirangko nangnikengachim, West Garo Hills Pencak Silat Association-ona contact ka•na man•gen ine u•iataha