SWGH a•jani Sindilgre Government LP Skulo skigipa dongjae poraigipa bi•sarangna gimaani ong•enga

Ampati, February 2, 2022: South West Garo Hills a•jani Salmanpara elakani ning•o donggipa Sindilgre songni Government LP skulo skigipa dongjae dal•a gimaani ong•enga. Sindilgre songni manderangni u•iatani gitade, Sindilgre Sorkari LP Skulo bilsi 2-na skigipa dongjani a•sel songni bi•sarang lekka poraniko skie ra•na man•jaengaha.

Iandakgipa obosta Sindilgre songo ong•engon, sorkari nirok sandie badia songo skigipa dongja gipin skigipako watatna nanga. Badiaba songrangode, skul bi•sarang bang•jaoba skigiparang sak 3, sak 4 donga. Indakgipa biaprangniko ba skulrangoniko sorkari sandie Sindilgre LP skulona watatskode songni manderangna dakchakani ong•genchim. Uni gimin district ge•antio badita ge sorkari LP skulrang dongachim aro badia songo skigipa dongja sandie skigipako on•na nangchongmota. Da•ode Sindilgre songni bi•sarang bang•a gimaaniko man•engaha ine songni manderang suk ong•gijaniko parakataha.

Sindilgre LP Skulni skigipa Ampati Hatisil songoni Rikkim Sangma ong•achim, ua skulni Committee-rangna aro songni manderangna maming u•iatgija an•tangni kamko songtang Hatisil skulona ra•jitangaha. Ua skulni committee-na kobor on•gija sruk sruk an•tangni kamko ra•jitangna man•aiama indake skatang kam ra•jitangna sorkari on•aiama ine songni manderang sing•doangaha.

Sindilgre LP Skulo skigipa dongjani gimin songni kangal-cholgri bi•sarangna dal•bea gimaani ong•engaha ineba u•iataha.

Uni gimin Meghalaya sorkariko chalaiengipa Skotong Minister Conrad Sangma aro Education Minister, Lahkmen Rymbui, Sindilgre songni Govt. LP Skul ona ta•rake skigipako watatpachina songni manderang mol•molataha.