Tura, July 11, 2022:West Garo Hills a•jani Anti Narcotics Task Force (ANTF) Robibar pringo niam gri drugs ba pekatgipa bosturangko badingenggipa manderangni gimin kobor man•soe, am•sandianiko dakenba sakgni manderangko Tura bajaroniko rim•aha ine koborko man•aha.
Koborna u•iatani gitade, rim•ako man•gipa manderanga New Tura Araimile, Gonga Damal-oni Cherak R.Marak aro Williamnagar Balsri gittimoni Tengsuang Sangma ong•achim.
Ia manderang baksa maruti alto gari ML-08 G-6541 bolsako rim•aha. Pulisrang uamangoniko gram 8.19 ong•gipa Heroin ba pekatgipa sam baksa tangka gong hajal 14,230, mobile phone ge 2 aro adita lekkarangko man•aha.
Rim•a man•gipa manderangko sing•sandion, ia samrangko East Khasi Hills a•jani Sohiong-o donggipa saksa Bryan Nongmor minggipa mande on•ataha ine ku•rachakaha.