Tura,March 7, 2022: West Garo Hills a•jani chadambe saksa an•tangni song nokna aro burung bolgrimna ka•saenba uni ong•sianganiko champengna ine a•jao songdongenggipa pilak jong ada no abi rangko molmole re•baenggipa March jani 19 tarik o song nokko jinma apsan rongtalatangna pilakon molmolna ska ine Kosi Songbad na u•iataha.
“An•ching sakantian chibima rikgam ba chiring chibisik rangchi jinma nokdangni manderang baksa ba ripeng jilma baksa piknik cha•na re•genchimoba,an•chingni ra•bitanggipa pilak bosturangoni mingsasik koba galgija noktangchi ra•angpilna. Batanggimin sal somoirango na•a indaka jabol rangko skatang galramram•genchimoba na•a an•tangni dakgualaniko namatpilna somoi donga,na•a chiring chibima rangchi auna miksuna ba piknik cha•narang re•anggenchimoba plastik,sabon bikap aro ma•manti jakkalani bosturangko skatang galaigija uarangko jola rango ba jak o ra•bite ra•bapile uko sorkarini gittim antina sualgipa Kalbong (Dustbin) o galeskaode nambatgen. Maina chiring sambao Kalbong (Dustbin) tarigipa rango galgenchim ong•ode, uko songsulo jilgipa a•chak do•o rang cha•ani am•e cha•enba ukode sera bera dakatpilna man•aia, uni gimin hai an•ching chakchikgija sakantian jabolrangko skatang galramramjana maina uan an•chingni nitobegipa songko aro nokko ong•siata. An•ching a•ja o donggipa nitobegipa dare rang,chiring chibisik rang jabolrangko skatang galramramanichi nosto ong•atako man•engaha. Iarangko champengna aro nitoe rongtale jakkalna an•chingni jak oan ong•a,uni gimin hai an•ching pilakan ma•a ambini an•chingna donanggimin nitobegipa gam jin ko ripinge rakkina aro uko nitodapatna,an•tangtangni jokako nigrike nokdangni manderang aro ripeng ska baksa jinma apsan ku•mong nangrime March jani 19 tarik o gittim tangko rongtalatan baksana chiring chibisik rangkoba rongtalatangjolna ine ku•mong nangrimna ska” ine chadambe saksa Te Eman Chambugong u•iataha.