Tura, March 5, 2022: West Garo Hills a•jao Sonibar salo Meghalaya Civil Services (MCS) porikkako sena tarisamsoenggipa chatro- chatrirangna Tura Government College-ni Auditorium-o u•iatani program ba Introductory Program-ko ong•atangaha.
Ia program-o Garo Hills-ni bang•a dingtang biaprangoni chadamberang ia aganskiprakani program-o bakko ra•angtokaha. Ia program-o West Garo Hills a•jani Extra Assistant Commissioner (EAC) Saljagring G Momin aro Ruby R Sangma MCS porikkana tarisamsoenggipa chatro chatrirangna General Studies aro Civil Services Aptitude Test (CSAT)-ni bidingo agantalate on•angaha.
Unbaksana WGH a•jani DC aro Chief Minister office-ni Secretary Emmanuel M Sangma aro EAC Cheman D Shira chadamberangna mongsonggipa porikka ba (Main Exams) aro Interview-ni bidingo agantalate on•angskaaha. Uasan ong•aigija EAC Raj Kumar Hajong aro Senior Medical and Health Officer Dr Bethel Marak maikai somoiko jakkale poraina nanga aro poraian baksana be•en bimangna maikai apsan somoio simsakjolna man•gen uani bidingo aganangskaaha.
WGH a•jani Deputy Commissioner Ram Singh-ba ia tom•bimonganio bakko ra•angaha aro syllabus-ko che•em che•em poraie porikkao maikai sena nanga uarangko talate on•angskaha.
IFS aro Working Plan Officer Terakchi K Marak ia tom•bimonganiona mongsonggipa sokgipa ong•e,
Additional Deputy Commissioner Dolrich Berlin G Momin rimchaksoani kattarangko aganangaha aro Selsella C&RD Block-ni BDO Jude Rangku T Sangma mitelpilani kattarangko agane tom•bimonganiko matchotataha.