Tura, April 19, 2023:West Garo Hills a•jani Deputy Commissioner (DC) Jagdish Chelani, a•jao chakna ampilgija ding•dugaengani gimin, Skulo poraienggipa chatro chatrirang aro skigiparangni neng•nikaniko nike, West Garo Hills a•jani pilak Primary, Middle, Secondary aro Higher Secondary Skulrangkon pring 8 bajioni attam 3 bajiona, April 19 tarik Butbar saloni April 21 tarik Sukrobar salona chutti wataha.
Indiba, attam aro walni skulrangko ka•angaigen chutti dongjawa ine parakataha. Deputy Commissioner a•jao agrepile ding•batroroengani gimin saoba ding•a chakna amjae, ga•akgropenba saa ding•aniko man•naba donga ine niksamsoanio pilak skulrangko chutti wataha. Uni gimin sakantian pilak a•sel ong•gnirangoniko champengsona a•jani bil gnanggipa Officer-rang baksana District Skul Education Officer (DSEO)-rangna ge•etaniko on•ataha.
West Garo Hills a•jani DC, re•baenggipa April 24 tarik Sombar salo, National Deworming Day (NDD)-ko pilak skul aro kolej-rango dakgen ineba u•iataha.Gipin ge•etaniko man•taikujana kingking pilakan ge•etgimin niamko ja•rikangchina DC didiataha.