Wiliamnagar, April 19, 2023: East Garo Hills a•jani nangrimgimin bang•a NGO-rang jekai GSU, FAF, AAYF, Williamnagar Govt. College Students’ Union, Williamnagar Loyola College Students’ Union, Williamnagar Auto Taxi Association aro Williamnagar Sumo Pick-Up and Tractor Association, Monggolbar salo tom•aniko ong•ate, Meghalaya a•doko so•sojengjeng ong•enggipa, Job Reservation Policy-ni bidingo darangkoba mikkang nitegija, apsangrik kamrangko man•pachina, Roster System-ko ra•gatani gimin chanchirimaniko dakangaha.
NGO-rangni tom•e chanchirimanio dongpagipa membor-rang sakantian Roster System-ko ra•gatgenchimode, A•chikrang namgipa chol ong•gen, iani bidingo an•tangtangni chanchiako jinmana parakangtokaha. NGO-rangni tom•e chanchianio Roster System-ko ra•gatani gimin parakangengon, A•chikrangna chamgimin bak rengsiko pangnan chu•gimik, man•rongja. Uni gisepon, High Court-ni on•gimin rai gita, Roster System-ko ra•gatjaode, A•chikrangna chamgipa bak rengsiko apsangrik man•paani dongjawa watchanggalgen. Unode, skango gita A•chikrangna dal•bea gimaani ong•gen, skangonin A•chikrangna apsangrik kamrangko suale on•ja, komiesa kamrangko man•enga.
Uni gimin iani bidingo manderangna mikkrakatani ba Public Awareness Programko ong•atna nanga ine GSU Eastern Zone-ni President Saljrang Tengrik Marak koborna u•iataha.