Tura, Feb 17, 2023: Ma•mongni Union Home Minister Amit Shah, Bristibar attamo skanggipa changna Garo Hills-ona re•bae, Tura Don Bosco Higher Secondary Skul field-o dal•begipa tom•bimonganio BJP candidate-rangna campaign ka•e, MDA sorkarini bang•a tangkarangko jakkalsretani a•sel Meghalaya a•doko corruption ong•enga ine aganangaha.
Amit Shah baksa BJP National Secretary incharge North East Rithuraj Sinha, Assam-ni Deputy Speaker Dr Numal Momin aro sak 6 BJP candidate-rang Bernard N.Marak, Adamkid M.Sangma, Bakul Hajong, Thomas Marak aro Brening Marak tom•anio dongpaaha.
Amit Shah A•chik Ku•chi aganna man•jani gimin manderango kema bi•e, sak 6 candidate-rangko talatate on•angaha.
“Meghalaya-o BJP-ko bilakbatna na•simang sakantian BJP candidate-rangna vote-ko on•pachina, anga mol•molna sika. Chinga a•dokni development-ko ra•bana pangnan do•ga oe donenga. Uni gimin an•chingni Prime Minister Narendra Modi-ni dolo bakrimbo” ineba didiangaha.
Meghalaya a•dokni ge 60 seatrangon, BJP candidate-rang susaenga, jedakode, BJP Meghalaya-o bilakna man•gen, ineba aganangaha.
“Meghalaya a•dokko man•chengaoni bilsi 50 gapaha, indiba a•doko sason ka•anirang namen namjani gimin corruption ong•enga. Batanggipa 2014 bilsioni 2023 bilsiona Modi-ni re•dilanichi a•song gimikon development ta•raken tang•doaha, indiba Meghalaya a•dokode development-rang sokbakuja. Uni gimin BJP dolko bilakatbo, an•ching corruption-ko bon•atgen” ineba agandapangaha.
A•doko aro ma•mong sorkari dolgni bakrime a•dok sorkariko chalaiani gimin namroro silrorona kraachim.
Amit Shah a•doko Central Scheme-rangko hragija jakkalani gimin aganengon, Modi sorkari Meghalaya a•dokna bang•a scheme-rangko watataha, indiba ua scheme-rang bachi gimaenga nikna man•jaha ine suk ong•janiko parakangaha.
A•doko bijoli tik ong•jani gimin aganangeon, “Na•simang BJP-ko bilakatode, konta 24 bijoliko ching•atna man•gen, bijolina neng•nikaniko man•jawa. A•doko Medical College-rang dongama ine sing•doangenba, Assam-ko niatbo chinga bilsi 5-o Medical College ge 5-ko a•bachengataha. Uandake Meghalaya a•doknaba Medical College ge 2-ko on•ataha, indiba a•dok sorkari kam ka•jaha” ine aganne, BJP bilona re•baode, Garo Hills-o medical college-ko ra•bagen ine Amit Shah ku•rachakangaha.
A•dokni manderang sanna bananiko aro skie ra•aniko dakna gipin biapchi re•angna nanggija, a•doktangon sanna banna aro skie ra•na man•na giita ge 2 medical college-rangko ge•sa Garo Hills-na ge•gipinko Khasi Hills-na on•ataha aro iano bang•a manderang kam ka•na janggi tangna cholko man•gechim, ineba Amit Shah aganangaha.
Home Minister-ni ku•rachakanga gitade, gimik a•dokrangon primary, secondary aro higher secondary skulrango, education system-ko dingtangatgen aro ku•siktangko skie ra•na man•gen ine parakangaha.
“Angna RBI-ni report on•a gitade, a•song gimiko namroro silroroani ka•sibatsranggipa Meghalaya a•dokan ong•a. Uni gimin chinga Meghalaya a•dokko North East gimiko nambataranggipa a•dok ong•atna miksonganiko anga ku•rachakenga” ineba Home Minister aganangaha.
BJP ge•gittam a•brini songrango IT Park-ko donna miksongenga, uarangoni mongsongbatgipa Tura-o ong•gen, una kror 100-ko MSME-na on•gen, jedakode chonchongipa industry-rangna dakchakani ong•gen ine aganangaha..
Unbaksana Modi sorkari tangka gong kror 5000-ko a•dokni national highway sorokrangna koros ka•aha. Indide gitcham sorkarirang batanggipa bilsi 50-o a•dokna maiko dakaha ineba Amit Shah sing•doangaha.
Una agreba BJP sorkari ge 39 Eklavya Skulrangko on•ataha, indiba a•doko skie ra•anirang namen ja•manchakenga.
“Narendra Modi chang 51 North East a•dokrangona re•baha. Ian India-ni History-o ba Ma•ambio Prime Minister-rangni gisepo bang•bate North East a•dokrangona re•babatgipa ong•aha.Ua North East a•dokrango development-ko gipatna re•baha. Indake BJP sorkari Prime Miniater Development NE-ni ning•o pangchake gong kror 6000-ko chamataha. Uni gimin Meghalaya-o corruption-ko bon•atna BJP baksa ku•monge kamrangko ka•anggen” ine anga ka•donga ineba aganangaha.
Uni gimin pangnan, “Na•simang re•bae ching baksa golpobo aro ching baksa bakrime Meghalaya a•dokni development-na chadengbo” ine Amit Shah sakantiko didiangaha.
BJP pangnan tribal jatrangna ka•saa aro rasong chaa, maina tribal-rangoni skanggipa changna Draupadi Murmu a•songni President ong•aha.
Indake tom•anio Meghalaya a•doko corruption ong•ani pal develop-ko ra•baskana, sakantian an•tangtangni gamchatgipa vote-rangko BJP candidate-rangna on•ne cheatchina Home Minister manderangko mol•molangaha.