Tura, March 26, 2022: West Garo Hills a•jani Tura songjinmao donggipa pilak kona noksikrangon ringani china namen neng•nikanirangko man•enga ine Tura-ni MDC Bernard N.Marak u•iataha.
“Contractor-rang jerangan Jal Jeevan Mission (JJM) project-ko jako ra•ahachim, kamko matchote ka•china sorkari contractor-rangna tangka gong kror 35-ko chamaha, indiba contractor-rang sorkariko aro a•dokni manderangko cha•bokenga. Tura songjinmani pilak gittimrangon ringani china neng•nikani bidingo badi ka•anirangko man•soaha. JJM-ni mitam kamrangko Contractor-rang matchote ka•jaha, indiba kam matchotaha ine report-ko tarie sorkarina mesoke tangkarangko oke ra•aha. Contractor-rang sorkarini JJM project-ko tarina on•gipa tangkarangoniko 25% san jakkalaiaha aro kamrangko matchote ka•jaha” ine Bernard Marak janapataha.
Bernard Marak-ni parakata gitade, Tura songjinmao ringani china neng•nikanirangko authority-ni manderang tarie on•jagenchimode, Contractor-rang aro je Officer-rangan contractor-rang baksa melie kamrangko matchote ka•gija tangkarangko oke cha•anio jak dongachim, uamangni kosako badi ka•anggen ineba Bernard Marak parakataha.