Tura, April 14, 2022: Tura Smart Town Project-ko dal•e ra•jani aro kamtangko name ka•jani a•sel dilgiparang, Boda ba Dumb Town Project pil•atna nangja ine Bernard Marak parakataha.
“Kamrangko namedake sing•sandie niahaon, Smart Town Project-ko 50% ni gitasan ka•aiaha aro ia kamko ka•na gita Contractor-rangko, Architect-rangko aro Designer-rangko a•paloniko rimbae jakkalaha. Uamang an•tangtangni namgnina Smart Town Project-ko Dumb Town Project gita kam ka•e on•skaaha. An•ching nikna gita man•gen, Chandmari, Ringre aro Aramile sorokrango ching•atna ba jasengataniko donna gita krongrangko songe ‘dama’-ni bimango tarigija ‘kul’ dakesa tariskaaha. Architect-rang dal•a gualaniko dakaha aro iako nike anga bilongen suk ong•ja. Ua designer-rangni gualaniko aganne ba skie on•jaha. A•jatangni Contractor-rangna ia kamko on•genchimode, Smart Town Project namen nitobegenchim.
A•palni Contractor, Architecture aro Designer-rang A•chik jatni doka dam•ani rokomrangko maming dakeba ma•sija” ine Bernard Marak janapataha.
Ia obostani bidingo RTI-rangko ka•aha jedakode, Smart Town Project, Dumb Town Project ong•jawa. Uamangni gualanide ‘Dama’ ko ‘Kul’ dake tariani a•selsa ong•aha. A•jatangni tangkarang indin ong•gramaijachina, contractor-rang an•tangtangni kamko nipiltaie uko namdapatna nanga ineba Bernard Marak janapataha.