Baghmara, April 14, 2022: Associatiion for Democracy and Empowerment (ADE) Baghmara aro ADE Rongara Unit, Budbar salo Rongara PHC-ko re•ange nieaha.NGO dilgiparangni re•ange nianio nikani gitade, Rongara PHC-o bijoli sringgipa sillittingrang namjaha, boundary-ni wall-ba dongja, ambulance gariba namja, building-rangba bretaha, ringani chikoba man•ja, paikanarangba namja, Dokdor aro Nurse-rangni dongchakgipa nokrangba mikka waode sela ran•jaha, cha•anirangko on•gipa chu•onga gita on•jaenga, sagiparangna mi-bijak songchakgipa babilsiba mikka waode chi ran•jani gimin namen Neng•nikaniko man•enga ine ADE Baghmara Regional Unit-ni dilgipa u•iataha.
Uni gimin sagipa mmanderangko sanram hospital Rongara PHC-ko a•dok sorkari ta•rake nirokatpachina aro kosako janapatgimin obostarangko re•ange nirokaniko dakenba kamrangko a•bachengatpilchina Baghmara-ni NGO dilgiparang sorkariko didiataha.
Mandeni janggiko jokatgipa hospital-an ong•a, indiba Rongara hospital namjani a•selan bang•a manderangni janggirang gimaaona sokenga aro kangal cholgri manderang chel•begipa hospital-rangchi ra•ange sagipa manderangko sanpana chol dongpaja. Uni gimin Sorkari manderangni namgnina chanchie Rongara PHC-ko namdapatchina Baghmara aro Rongara-ni ADE dilgiparang sorkario dabiangaha.