Tura-o a•bachengatgipa gital lottery-ko kal•e bang•a manderang tangkarangko man•tok

Tura, March 16, 2022: Re•anggipa March 14 tariko Tura-ni MDC Bernard N.Marak-ni Tura Hawakhana-o a•bachengate on•anggipa, Nagaland State Lottery-ko kal•e bang•a Tura-ni manderang skanggipa salo gittamgipa, brigipa aro bongagipa prize-ko man•ne tangkarangko man•angtokaha. Ia gital lottery-ko March 14 tarikoni salo chang 3 ka•e, salni 1 bajio, attam 6 bajio aro wal 8 bajio kal•rongenga.Uni gimin je manderangan an•tangtangni rasongko nina sikengachim, tikitrangko salantian brena gita man•gen, tikit kingsani dam gong 6, indiba tikitko king 5-na komie brena man•ja, tangka gong 30-ni tikit king 5-ko brena nanggen ine u•iataha.

Ia gital lottery-ko Tura-o a•bachengate on•engon, rasong gnanggipa manderang tangkarangko man•ne an•tangtangni janggi tangani gadangko tang•doatna chol ong•gen ingipa miksonganio ia lottery-ko Garo Hills-o a•bachengate on•aha ine Tura-ni MDC, Bernard N.Marak ia lottery-ko oprake on•ani salo aganangaha.

Indake ia lottery-ko a•bachengate on•ani bidingo bang•a manderang Tura-ni MDC-de maming develop dongja, lottery aro kal•susaanirarakosa ra•be on•skaenga ine matnangenba, ia lottery-ko kal•e chegipana bani kror 1 tangkako on•na man•gen ine matnanganiko bang•a social mediarango niksona gita man•aha.Indiba ia matnanganirangna indake talataniko on•atenba, ia lottery-ko kal•e chegiparangna Tura-ni MDC tangkarangko on•ja, Nagaland a•dokni sorkarisa chegiparangna tangkarangko on•atenga aro ia lottery-ko Garo Hills-o a•bachengatna gita Meghalaya a•dokni Governor, Nagaland a•dok sorkari baksa nangrime ra•chakgimin bilko man•nesa ia lottery-ko ong•atenga ine Wilver Greham Danggo aganchakatskaha.