Siju-o gital block-ko songe on•china SBDC Skotong Miniater-ko gronge mol•molanga
Baghmara, March 17, 2022: South Garo Hills a•jani Siju aro uni wilwilao songdong a•chaenggipa bang•a dingtang dingtang songni manderang apsan ku•monge, Siju-o gital block-ko dabina gita Siju Block Demands Committee (SBDC)-ko songe, SBDC-ni President Terial Sangma aro Secretary Anjoy Marak-ni dilanichi Budbar salo Committtee-ni dilgiparang a•dokni Skotong Minister Conrad Sangma-ko Shillong songjinmao grongenba Siju-o gital block-ko songe on•china mol•molangaha.
SBDC-ni u•iata gitade, Siju aro uni wilwilao songdonggipa manderang Rongara block-ona chel•begipa ramarangko re•ange an•tangtangni nanga kamrangko ka•na nangachim aro basakoba salsao kamrang matchotna man•jaode tangka paisa koros bon•ne changni chang re•angtaitaina nangani a•selo neng•nikaniko man•rongachim. Indakgipa obostarangko chagrongani gimin jolni manderang an•tangtangni neng•nikaniko janape gital block-ko dabina dingtangmancha Commttee-ko songe, ia 2022 bilsi dipet Siju-o gital block-ko songe on•china Skotong Minister-o dabiangtokaha.
Skotong Minister SBDC-ni dabianiko knachake, uamangna ka•dongani kattarangko aganataha. Skotong Minister-ni uamangna aganatani gitade, re•baenggipa May jani skanggipa antio tom•aniko ong•ate, Siju-o gital block-ko rikna gita pangchakani ro•ongko songe on•anggen ine ku•rachakataha.
Indake Skotong Minister-ni namgipa aganchakaniko man•ne SBDC-ni dilgiparang kusi ong•bee Skotong Minister-na mittelpilani kattarangko parakatskaha.